- Biblica® Open New Luo Translation 2020 Ayub Ayub Ayub Ayu Ayub Weche motelo Ne nitie ngʼat moro mane odak e piny Uz mane nyinge Ayub. Ngʼatni ne en ngʼama longʼo chuth kendo ngʼama kare; ne oluoro Nyasaye kendo nokwedo gik maricho. Ne en gi yawuowi abiriyo gi nyiri adek kendo ne en gi rombe alufu abiriyo, ngamia alufu adek, rweth pur mia abich, gi punde mia abich, kendo ne en gi jotich mangʼeny. Kuom mano, ne en ngʼat marahuma moloyo ji duto modak yo wuok chiengʼ. Yawuote ne loso nyasi e utegi, ka moro ka moro kuomgi ni godiechienge kendo ne luongo nyiminegi adek mondo ochiem kendo ometh kodgi e nyasigigo. Kane kinde mane gitimoe nyasigo oserumo, Ayub ne luongogi mondo opwodhgi. Okinyi kogwen notimo misango miwangʼo pep ne moro ka moro kuomgi, koparo ni dipo ka achiel kuomgi osetimo richo mi giyanyo Nyasaye gie chunygi. Ma ne en tim Ayub mane otimo kinde ka kinde. Tem mokwongo mar Ayub Chiengʼ moro achiel malaike nobiro e nyim Jehova Nyasaye, kendo Satan bende nobiro kodgi. Jehova Nyasaye nopenjo Satan niya, “Ia kanye?” Satan nodwoko Jehova Nyasaye niya, “Asebedo ka abayo abaya e piny, kendo alworora koni gi koni.” Eka Jehova Nyasaye nowachone Satan niya, “Dipo ka iseparo wach moro kuom jatichna Ayub? Onge ngʼato machielo e piny ngima machalo kode nikech olongʼo kendo ngʼama kare en ngʼat moluora kendo motangʼ ne richo.” Satan nodwoko niya, “Iparo ni Ayub oluoro Nyasaye kaonge gima omiyo? Donge iseketo chiel molwore en kaachiel gi ode kod gik moko duto ma en-go? Donge isegwedho tich lwete, momiyo jambe gi kwethne olak e pinyno duto? Tem ane ikaw gik moko duto ma en-go ka ok dokwongʼi e wangʼi?” Jehova Nyasaye nowachone Satan niya, “Kare ber, gimoro amora ma en-go ni e lweti, to en owuon kik imule kata gi lith lweti.” Eka Satan nowuok oa e nyim Jehova Nyasaye. Chiengʼ moro ka nyithind Ayub ne chiemo kendo metho e od owadgi maduongʼ, achiel kuom jotij Ayub nobiro ire mowachone niya, “Noyudo ka wapuro gi rwedhi kendo punde ne kwayo machiegni kodwa, to jo-Sabea nobiro momonjowa kendo okawogi duto. Bende gisenego jotiji duto gi ligangla ma an kendo ema atony mondo anyisi wachni!” Kane oyudo pod owuoyo, jatich machielo nobiro mowacho niya, “Maj Nyasaye nolwar koa e polo mowangʼo rombe kaachiel gi jotich, kendo an kenda ema asetony mondo anyisi wachni!” Kane pod owuoyo, jatich machielo nobiro mowacho niya, “Jo-Kaldea noloso migepe adek mag jolweny mi gimonjowa ma gikawo ngamia-gi duto kendo gidhigo. Gisenego jotichni duto gi ligangla, kendo an kenda ema asetony mondo anyisi wachni!” Kane pod owuoyo, jatich machielo bende nobiro mowacho niya, “Yawuoti gi nyigi ne jochiemo kendo metho e od owadgi maduongʼ, eka apoya nono yamo maduongʼ nomwomore koa e piny motimo ongoro kendo nogoyo konde angʼwen mag ot. Odno norwombore kendo giduto gisetho ma an kenda ema asetony mondo anyisi wachni!” E sa onogo, Ayub noa malo mi oyiecho lepe kendo olielo yie wiye. Eka nopodho piny auma kolemo, kowacho niya: “Ne aa ei minwa ka an duk, kendo abiro dok ka an aduk. Jehova Nyasaye ema nochiwo kendo Jehova Nyasaye ema osekawo; mad nying Jehova Nyasaye opaki.” Kuom magi duto, Ayub ne ok otimo richo kata kwano Nyasaye kaka jaketho. Tem mar ariyo mar Ayub Odiechiengʼ machielo, malaike nochako obiro mondo gichungʼ e nyim Jehova Nyasaye, kendo Satan bende nobiro kodgi. To Jehova Nyasaye nopenjo Satan niya, “Ia kanye?” Satan nodwoko Jehova Nyasaye niya, “Asebedo ka abayo abaya e piny, kendo alworora koni gi koni.” Eka Jehova Nyasaye nopenjo Satan niya, “Dipo ka iseparo wach moro kuom jatichna Ayub? Onge ngʼat machielo e piny ngima machalo kode nikech olongʼo chuth kendo en ngʼama kare moluora kendo motangʼ ne richo.” Pod osiko mana gi berne mapile, kata obedo ni ne idonjone ira mondo atieke kaonge gimomiyo. Satan nodwoko niya, “Dhano nyalo yie weyo gimoro amora ma en-go mana ni mondo obed mangima. Koro temie kimulo dende gi chokene ka ok dokwongʼi e wangʼi.” Jehova Nyasaye nowachone Satan niya, “Mano ber, koro en e lweti; makmana ni ngimane ema kik imul.” Kuom mano Satan nowuok oa e nyim Jehova Nyasaye, kendo nogoyo Ayub gi buche maremo malit, kochakore e tiende nyaka e wiye. Eka Ayub nokawo balatago, mondo ogwonyrego kobet e buru. Chiege nokone niya, “Pod kitini itwerigo atweya kuom Nyasachini? Angʼo mamoni kwongʼo Nyasaye mondo itho!” To nodwoke niya, “Iwuoyo ka dhako mofuwo. Diwayie mana gi ber kende ma aa kuom Nyasaye to ok chandruok?” Kuom magi duto, Ayub ne ok otimo richo e gimoro amora mane owacho. Osiepe Ayub adek Ka osiepe Ayub adek mane gin Elifaz ja-Teman gi Bildad ja-Shua kod Zofar Ja-Namath nowinjo chandruok duto mane en-go, ne giwuok ka gia e miechgi kendo ne giwinjore mondo girom kaachiel mondo gidhi gitimne mos kendo gihoye. Kane ginene ka pod gin mabor, ne ok ginyal ngʼeye. Negichako ywak matek, kendo ne giyiecho lepgi mi gibukore gi buru. Bangʼe negibet kode piny e lowo kuom ndalo abiriyo odiechiengʼ gotieno. Onge ngʼama nowachone wach moro amora, nikech negineno ka chandruok mane en-go ne pek moloyo. Ayub owuoyo Bangʼ mano, Ayub nowuoyo ka kwongʼo chiengʼ mane onywole. Ayub nowacho kama: “Mad chiengʼ mane onywolaeni lal nono, kaachiel gi otieno mane owachie ni, ‘Onywol nyathi ma wuowi!’ Odiechiengno mad lokre mudho; mad Nyasaye man malo kik dewe; mad ler moro amora kik rieny kuome. Mad odiechiengno otim luoch kendo mudho mandiwa oime; boche polo mondo oume; kendo wangʼ chiengʼ otim mudho. Otienono, mad olal e mudho mandiwa; kik obed kaka achiel kuom odiechienge mag higa, kendo kik kwane kaka achiel kuom odiechienge mag dwe. Mad otienono bed migumba; mad kik winj koko moro amora mar mor e iye. Mad joma kwongʼo odiechienge okwongʼ odiechiengno, ma gin jogo molony gi luongo le manie nam miluongo ni Leviathan mawuogi. Mad sulwege mokinyi lokre mudho; mad piny mogeno ni biro ru tamre, kendo kik one ka ugwe chako wangʼ, nikech ne ok oloro dhoudi mag ii minwa mondo ne kik nywola kendo ane chandruok makoro anenogi. “Dine atho ei minwa, kata dine obwoga ka inywola? Angʼo momiyo minwa nopira e chonge kendo adhodho thunde? Nimar dikoro ayweyo gi kwe; kendo dikoro anindo kendo ayweyo, gi ruodhi kaachiel gi jongʼad rieko mag piny, mane ogero kuondegi madongo mag dak matinde olokore gundni, kaachiel gi joloch mane nigi dhahabu, kendo mane opongʼo utegi gi fedha. Koso angʼo mane omono panda ei liel ka nyathi monywol kosetho, kata ka nyathi mayom mane ok oneno ler mar odiechiengʼ? Kuno joma timbegi richo weyoe timbegigo, kendo kuno joma ool yudoe yweyo. Joma ni e twech kuno bende winjo maber; nikech gionge gi nyapara ma chikogi kuno. Jomatindo gi jomadongo ni kuno kata wasumbini bende bedo maonge e bwo chik. “Angʼo momiyo ichiwo ngima ne joma winjo malit, kod ngima ne joma chunygi lit, gigombo tho, to tho ok neg-gi, adier, gidwaro tho moloyo mwandu mopandi, gin joma opongʼ gi mor kendo gibedo moil ka gitundo ei liel? Angʼo momiyo owe ngʼato ka ngima to yorene odinore, ka ngʼatno Nyasaye ogengʼone koni gi koni? Nikech kuyo kod ywak omona chiemo; kendo chur ma achurgo chalo gi oula mabubni. Gima ne aluoro ema koro osemaka; gima ne aluoro mogik e ngimana ema koro osetimorena. Aonge gi kwe, chunya chandore; aonge yweyo, kendo thagruok lilo ema aneno.” Elifaz Eka Elifaz ja-Teman nodwoke kama: “Bende chunyi nyalo doko malit ka ngʼato okeloni wach moro nimar ok anyal lingʼ mak awuoyo? Parie kaka isepuonjo ji mangʼeny, kendo isejiwo joma chunygi onyosore. Wechegi osekonyo joma opodho; kendo isejiwo joma tekogi orumo. To koro chandruok osechoponi kendo chunyi onyosore omiyo ionge gi kwe. Luor miluorogo Nyasaye dak koro miyi chir koso ngimani moriere dak koro miyi geno? “Koro par ane: En ngʼa mosekum maonge ketho? Koso joma kare mage minyalo tieki? Gima aseneno en ni joma chwoyo richo gi chandruok kayo mana richo. Itiekogi apoya nono gi much Nyasaye; kendo sa ma mirimbe obiro to gilal nono. Sibuoche nyalo ruto kendo sibuoche mager nyalo goyo asumbi, to kata kamano leke sibuoche maroteke osemuki. Sibuor koro tho nikech gima ocham onge, kendo nyithi sibuor oringo ma oke. “Ne okuodhna wach moro mos, to ne awinje mana marach rach. Wachni nobirona gotieno e yor lek, e sa ma nindo goye ji ngoga, kendo luoro gi kibaji nogoya momiyo denda duto onyosore. Eka muya nokudho wangʼa, mi yier denda duto nojuol. Nochungʼ molingʼ thi, to ne ok anyal ngʼeyo ni en angʼo. Kido moro nobiro mochungʼ e nyim wangʼa, kendo nawinjo dwol moro machil, kawacho niya: ‘Bende dhano mangima nyalo bedo makare moloyo Nyasaye? Dhano bende dibed maler moloyo jachwechne? Ka Nyasaye ok nyal geno jotichne, ma kata malaika bende joketho e nyime, to koro ere kaka dodew dhano molos gi lowo, ma mise mag-gi en mana buru, ma inyalo duny marum mana ka oguyo! Chakre kogwen nyaka odhiambo inyalo turgi matindo tindo ka ok ongʼeyo, kendo gilal nyaka chiengʼ. Donge tondegi ma gitweyogo hema igonyo, mondo omi githo ka gionge rieko?’  “In Ayub, luong ane ka bende nitiere ngʼama nyalo dwoki? Bende nitie kuom jo-malaika minyalo ringo irgi? Ich wangʼ nego ngʼama ofuwo, kendo nyiego tieko ngʼama omingʼ. An awuon aseneno ngʼama ofuwo ka odak e ngima maber, to apoya nono opo ka ode okwongʼ. Nyithinde ok nyal yudo konyruok kendo onge ngʼama chwakgi e od bura. Joma kech oloyo chamo chamb ngʼat mofuwono, nyaka mago madongo e kind kuthe, kendo joma riyo oloyo dwaro yako mwandune. Nikech richo ok honre ahona kayiem, kata chandruok bende ok bi kaonge gima omiyo. To dhano inywolo ei chandruok, mana kaka pilni mach dhwolore kadhi malo. “Dine bed ni an in, to dine atero ywakna ne Nyasaye; kendo keto weche mathaga e nyime. Otimo gik madongo miwuoro ma rieko dhano ok chopie honni mage thoth ma ok nyal kwan. Omiyo koth chue e piny; kendo omiyo puothe bedo mangʼich. Joma ni piny otingʼo malo, kendo ohoyo joma ywak. Oketho chenro mar joma paro timo timbe mamono mondo omi gik ma giparogo kik timre. Omako joma riek gi riekogi giwegi, kendo gimoro amora ma giparo timo ok timre. Piny othonegi mudho kata mana ka chiengʼ rieny, gibagni odiechiengʼ tir mana ka gima en otieno. Oreso joma odhier e dho tho; kendo oresogi e lwet joma roteke. Omiyo joma odhier bedo gi geno, to joma timbegi mono omiyo lingʼ thi. “En jahawi ngʼat ma Nyasaye kwero, omiyo kik icha kum mar Jehova Nyasaye Maratego. Nimar kokecho kodi mochwadi to en bende ema ochako othiedho kuonde mohinyorego. Enoresi ka in e masiche mar auchiel; to adier, ok enoweyi ichopi e masiche mar abiriyo. Ka dera omako piny, to obiro resi e tho, kendo ka lweny gore to obiro resi e dho ligangla. Enopandi kuom dhok makwongʼi, kendo ok niluor kethruok mabiro. Inibed mamor ka masira gi kech nitie kendo ok niluor le mager mag piny. Nikech initim winjruok gi kite manie lowo, kendo le mag bungu nobed kodi gi kwe. Iningʼe ni hembi oriti maber; inikwan mwanduni achiel achiel, kendo ok niyud kaonge moro kuomgi molal. Inibed kingʼeyo ni nyithindi nobed mangʼeny, kendo nyikwayi nochal gi lum manie piny. Inidag amingʼa mitho kapod itegno, mana ka cham mokaa e kinde mowinjore. “Wasenono wachni, mwanwangʼo ni en adier. Omiyo winje kendo iti kode e ngimani.” Ayub odwoko Elifaz Eka Ayub nodwoke kama: “Ka dine bed ni inyalo pimo chandruok ma an-go, kata pimo masira duto momaka e ratil, to adier, dine gibedo mapek moloyo kwoyo mathoth manie dho nam, mano emomiyo wechena osebedo ka yombore. Aserni mag Jehova Nyasaye Maratego osechwoyo denda, ringra opongʼ gi kwiri marach ma asernigo okelo; kendo masiche mag Nyasaye olwora koni gi koni. Donge punda nyalo mana ywak ka oonge lum mocham, kata rwath nyalo ywak kaonge chiemo? Chiemo maboth bende inyalo cham ka ok oketie chumbi, koso mit mane miyudo ei nyai tongʼ marachar? Ok ahero chiemo ma kamago; nimar chiemo ma kamago miya tuo. “Kuom mano, mad ayud gima akwayo, mad Nyasaye chiwna gima ageno yudo, kendo oyie otoya matindo tindo mi onega chuth. Kotimona kamano eka chunya noyud hoch, anabed gi kwe, kata obedo ni an gi rem malit; nikech ok asedagi weche mag Ngʼama Ler. “Teko mane ma an-go ma dimi pod abed gi geno? Ber mane ma pod ni e nyima madimi abed mos? An gi teko machal gi teko kidi koso? Bende ringra olos gi nyinyo? Bende an gi teko mar konyora kenda ka koro giga duto osegol kuoma? “E kinde ma ngʼato nigi chandruok kama, to osiepne onego okeche, kata obedo ni oseweyo luoro Jehova Nyasaye Maratego. Owetena to oselokore joma ok nyal gen, mana ka aore matindo ma pigegi ok siki kata ka oula mogingore ndalo koth, to pe manie wi gode lokore oula kendo mogingore gi pi mamol, e kinde oro to gichungʼ ma ok ringi, kendo lal nono e yoregi kinde ma piny liet. Jowuoth baro weyo yoregi ma giluwo; gidhi nyaka piny motwo mi githo kuno. Jowuoth moa Tema gi johala moa Sheba manyo aore mondo oyudie pi. Gibiro ka gin gi geno mar yudo pi, to ka gichopo kanyo to giyudo ni pi ma gineno onge, mi chunygi nyosre. Koro in bende iselokori ngʼama ok nyal konyo; kineno gimoro mabwogo ji to luoro maki. Bende asekwayoue mondo umiyae kony moro mugolo kuom mwandu mondo akonyrago, kata mondo uresa e lwet wasika, kata resa e lwet jo-mahundu? “Puonja, eka analingʼ, nyisa kama asedhie marach. Mano kaka weche madier lit kaka kudho! To weche mihango mathothgo, to nyiso angʼo? Dibed ni iwuoyo kamano mondo omi iket weche ma awacho kare kendo mondo ikaw weche ngʼama neno malit ka gima nono? Ichalo ngʼama nyalo goyo ombulu mar nego nyathi kich kendo inyalo ndhogo kata mana osiepeni. “To koro yie ichomie wangʼi kuoma kendo iranga maber iparo ni anyalo wuondi e wangʼi? Lokri, iwe timo ne ji marach; par maber kendo, nikech an ngʼat makare. Bende nitie gimoro amora marach ma lewa osewacho? Donge an gi rieko mar ngʼeyo gima ok owinjore? “Donge dhano nigi tich matek e piny? Donge ndalone chalo gi ndalo mag ngʼat mondiki kuom kinde machwok? Mana kaka misumba ma gombo ni seche mag odhiambo ochop piyo, kata ka ngʼama ondiki marito chudo mare gi geno, e kaka an bende osemiya dweche maonge ohala kod otieno mopongʼ gi chandruok. Ka adhi nindo to piny ok runa piyo kendo aparora ni abiro aa malo sa adi? Piny budhona kapok oru, kendo apuodora koni gi koni nyaka okinyi. Denda kute gi adhonde opongʼo, pien denda mbala omako kendo chwer tutu. “Ndalo mar ngimana dhiyo mapiyo moloyo masind jachwe usi, kendo orumo piyo maonge geno. Yaye Nyasaye, parie kaka ngimana en mana muya nono; wengena ok nochak one mor kendo. Wenge makoro nena sani ok nochak onena kendo, gibiro dwara to ok gininena. Mana kaka bor polo rumo mi lal nono, e kaka ngʼat miyiko e liel ok duogi. Ok nodwogi e ode kendo; kar dakne ok nongʼeye kendo. “Emomiyo ok anyal lingʼ; abiro wacho lit manie chunya, abiro nyiso pek ma an-go e chunya nikech mirima ma an-go. An nam, koso an ondiek nam momiyo ogona agengʼa kama? Ka aparo ni kitandana biro hoya kendo ni piendena mayom biro dwoko chandruokna chien, to eka pod ibwoga gi lek magalagala kendo imiya luoro gi fweny mayoreyore, momiyo koro daher mondo adera kendo atho, moloyo bedo gi ringruok ma an-goni. Achayo ngimana; ok agomb kata medo bedo mangima. Weya mos; ndalo mag ngimana onge gi tiende. “Yaye Nyasaye, dhano to en angʼo momiyo ikawe ka gima lich kendo isiko ipare ndalo duto, koso angʼo momiyo isiko inone okinyi kokinyi kendo iteme sa ka sa? Yaye Nyasaye, bende diweye ngʼiya, kata kuom thuolo matin kende? Yaye jarang ji-ni, kata bed ni asetimo richo, to en angʼo ma asetimoni? Angʼo momiyo an ema inena? Koso dibed ni asebedoni tingʼ mapek mohingi? Angʼo momiyo idagi ngʼwonona kuom ketho maga kendo itamori wena richoga? Nikech koro abiro tho machiegni; ibiro manya, to ok enonwangʼa.” Bildad odwoko Ayub Eka Bildad ja-Shua nodwoko kama: “Ibiro dhi nyime kiwacho gik ma kamago nyaka karangʼo? Wecheni chalo mana ka yamo makudho matek. Bende Nyasaye nyalo ngʼado bura ma ok nikare? Bende Jehova Nyasaye Maratego nyalo weyo timo gima kare? Kane nyithindi otimo richo e nyime, noweyogi mondo giyud kum mowinjore gi richogi. To ka inyalo dok ir Nyasaye mi iket kwayoni ne Jehova Nyasaye Maratego, kata ka dine in ngʼama ler kendo ngimani oriere tir, to dine oani malo mokonyi, kendo dine oduogi kari mowinjore kodi. Kata obedo ni chakruok mari ne rachrach, ndaloni mabiro nyime biro bedo malich miwuoro. “Penj ane tiengʼ mosekalo mondo ingʼe gik mane kweregi opuonjore, nikech wan to nyoro eka nonywolwa, kendo ok wangʼeyo gimoro, kendo ndalowa e pinyni chalo tipo. We ipuonjri rieko kuom joma chon mondo iyud rieko kod ngʼeyo mane gin-go? Bende togo nyalo dongo marabora kama thidhna ongee? Koso odundu bende nyalo dongo maber kama pi onge? Kapod gidongo maber kendo pod ok ongʼolgi oko, to gitwo piyo moloyo lum. Mano e gima timore ne joma oweyo Nyasaye; kamano e kaka geno mar joma okia Nyasaye rumo. Gima ogeno kuome en gima nono; kendo gima oyiengoree chalo mbui mar otiengʼ-otiengʼ. Koro ka giyiengore e mbuyi, to mbuyi dikonygi adier, ma ok oyiech? Koso ka gimako usi, to usi diresgi ma ok ochot. Ochalo gi yien motwi kama otimo pi to chiengʼ goyo ma bedene yarore piyo piyo e puodho; tiendene olawore e lwendni, kendo kere e dier kama otimo kite. To ka opudhe oko kama otweyeno, to kanyo kwede kawacho ni, ‘An ne ok aneni!’ Ngimane ner mi rum adier, kendo yiende mamoko ema twi e lowo mane entiereno. “Adier, Nyasaye ok kwed ngʼama onge ketho, bende ok ochwak joma timbegi richo. Obiro miyo ichako inyiero kendo ibiro bedo mamor. Wasiki biro rwako wichkuot ka law, kendo miech joma timbegi richo ok nochak one kendo.” Ayub odwoko Bildad Eka ayub nodwoko kama: “Ee, angʼeyo ni gima iwachono en adier. To ere kaka dhano mangima nyalo bedo kare e nyim Nyasaye? Kata dabed ni ngʼato dwaro mino kode wach, to bende dhano diduok penjo achiel kuom penjoge alufu achiel. Riekone tut kendo tekre ngʼeny. En ngʼa mosepiem kode miloye? Ogolo gode kuonde ma gintie ka ok gingʼeyo kendo ongʼielogi ka en gi mirima. Oyiengo piny gie mise mare kendo omiyo sirni mage yiengni. Kowuoyo to chiengʼ ok rieny kendo oumo ler mar sulwe. En owuon ema noyaro polo kendo en ema nonyono apaka madongo mag nam. En ema nochweyo sulwe madongo kaka, yugni, oluoro-budho, ratego, kod sulwe mogudore mathoth man yo milambo. Otimo gik madongo miwuoro mayombo pach dhano, honni mathoth ma ok kwanre. Ka okadho buta to ok anyal nene; ka odhi nyima to ok anyal yange. Kokawo gimoro odhigo; to en ngʼa manyalo tame? En ngʼa manyalo penje ni, ‘Ma to angʼo ma itimoni?’ Nyasaye ok gengʼ mirimbe kendo nyaka jolwenj Rahab bende noloyo mopodho e tiende. “Ere kuma dayudie weche ma dawachne? Koro ere kaka damin kode wach? Kata dabed ni aonge richo kata achiel, to ok dadwoke; anyalo mana ywagora ne jangʼadna bura mondo okecha. Kata dabed ni aluonge mi obiro ira, to ok ayie ni onyalo winjo wachna. Mirimb Nyasaye nyalo tieka kendo onyalo miyo adhondena medore kayiem nono. Ok onyal weya aywe to otimona mana gik mamiyo chunya bedo malit. Kaponi teko ema iwuoyoe, to otek ndi, kendo kata ka adiera ema ilose, to en ngʼa manyalo chune mondo obi onyis wach kuome. Kata dabed ni aonge richo kata achiel, to dhoga pod biro mana ndhoga. Kata dabed ni aonge rach moro amora, to dhoga pod biro miyo inena kaka jaketho. “Kata dabed ni aonge gi ketho moro amora, to onge ber maneno, nikech ngimana en kayiem nono. Ma emomiyo aneno ni gik moko duto chalre nikech okumo joma onge ketho kod joma timbegi richo machalre. Ka masira oneko apoya, to pek ma ngʼat makare oyudo ok obadhe. Nyasaye oseketo piny e lwet joma timbegi richo, bende omiyo jongʼad bura duto bedo muofni. To ka ok en ema notimo kamano, to ngʼatno mane otimo mano? “Ndalona ringo mapiyo moloyo jangʼwech; girumo piyo ka gionge mor kata matin. Gikadho piyo mana ka yiedhi molos gi oundho maringo e nam, kendo ka ongoe mafuyo e kor polo karango piny mondo omak nyagweno. Ka anyalo wacho ni wiya owil gi gik maricho ma Nyasaye osetimona, to abiro loko pacha mi abed mamor. Kata kamano, pod aluoro aluora masira momaka nikech angʼeyo ni Nyasaye ok nyal kwana ka ngʼat maonge ketho. Kaka koro osekawa ni an jaketho, angʼo ma dimi pod anyagra nono? Kata dine aluokra gi sabun mi aluok lwetena maler, to pod ibiro luta mana e chwodho mi nyaka lepa bende biro jok koda. “Nyasaye ok en dhano kaka an ma dahedhra dwokora kode, kata madimi wayal kode e od bura. Ka dine bed ni nitie ngʼato manyalo bedo jathek e kinda gi Nyasaye, kata ngʼato manyalo ngʼado bura e kinda kode, kata ngʼat manyalo golo kum mare kuoma, mondo omi masichene kik bwoga, eka dine awuoyo ka ok aluore, to kaka weche chal sani, ok anyal timo kamano.” “Aol gi ngima; mano emomiyo ok abi lingʼ ma ok awuoyo, to abiro wacho lit duto manie chunya. Abiro wachone Nyasaye niya: Kik ikuma, to nyisa rachna momiyo ikwana kaka jaketho. Nyalo bedo ni iwinjo maber ka ahinyora; kendo ka ikwedo tich lweti, to timbe joricho to mori? Kara in bende in gi wangʼ mar ringruok? Koso in bende ineno mana kaka dhano neno? Kara in bende ndaloni nok ka ndalo dhano, koso higni magi chalo gi mag dhano, momiyo imanyo timbena maricho kendo isiko kimanyo richo moro amora ma an-go, kata obedo ni ingʼeyo maber ni aonge ketho kendo ni onge ngʼama nyalo resa e lweti? “Lweti ema nochweya. Ibiro lokori koda kendo mondo itieka? Parie ni ne ichweya koa kuom lowo. Koro sani, diduoka kendo e lowo adier? Donge ne iola oko ka chak kendo ne ipuoya mi apoto ka mo, ne ichweyo ringra gi choke kod leche mi iumo chokena gi ringʼo kod pien? Ne imiya ngima kendo ne itimona ngʼwono, kendo isebedo ka irito chunya kuom duongʼni maler. “To kata kamano, koro angʼeyo ni gik mane ni e pachi e magi: Isebedo ka ingʼiya mondo ineane ka atimo richo, to ok iseweya ma ok ikuma. Okwongʼa, an ngʼat ma timbene mono! To kata ka aonge ketho, to pod ok anyal bedo thuolo, nimar wichkuot ma an-go osemiyo alal ei masichena. To kata katemo mondo abed thuolo to idwara mana ka sibuor, kendo isiko mana kiloya gi tekoni maduongʼ. Ikelo joneno manyien mondo okweda kendo imedo bedo mager koda; jolweny magi monja mana ka apaka magingore. “Angʼo momiyo ne igola ei minwa? Kara mad ne atho kapok wangʼ moro amora onena. Mad ne kik nywola, ka ok kamano to ne onego nywola ka asetho kendo chom koda bur tir! Donge ngimana modongʼ matin-ni chiegni rumo? Yie iweya mondo abedie gi yweyo matin, kapok adhi kuma ji ok dhiye miduogi, ma en piny motimo mudho gi tipo molil ti, en piny ma otimo mudho mandiwa, kama kata ler chaloe mudho.” Zofar Eka Zofar ja-Namath nodwoko ni, “Weche miwacho mathothgi bende nyalo kadho nono mak odwoki adier? Bende inyalo kwani kaka ngʼama kare adier, ngʼat ma wuoyo mangʼenyni? Wechegi manonogo bende nyalo hoyo ji malingʼ? Iparo ni onge ngʼama nyalo kweri kijaro ji kamano? Ere gima omiyo iwachone Nyasaye ni, ‘An giyie makare kendo aler e nyimi?’ To mano kaka daher mondo Nyasaye odwoki kuom wachno, mondo omi onyisi yore mopondo mag rieko, nimar rieko madier nigi rachne gi berne. To ngʼe ni Nyasaye wiye osewil kata mana gi richogi moko. “Bende inyalo ngʼeyo weche mopondo mag Nyasaye? Bende in gi teko mar ngʼeyo kuma duongʼ mar Jehova Nyasaye Maratego ogikie? Giboyo moyombo polo, koro in to ditimie angʼo? Gitut moloyo bur liel; koro in to ditimie angʼo? Bor margi oyombo bor mar piny kendo lach margi oloyo lach mar nam. “Ka onyalo biro sani mi otweyi e od twech kendo ochok bura mayali, en ngʼa ma disire? Adier, oneno joma wuondore; kendo koneno richo, to donge ondiko piny? Ka nyathi punda inyalo nywol ka muol, to kara ngʼama ofuwo bende nyalo bedo mariek. “Kata kamano ka ichiworine kendo imiye chunyi, bende ka iweyo timo richo kendo ingʼado ni richo moro amora ok bed e dalani, eka inyalo bedo thuolo kionge gi wichkuot kendo ibiro chungʼ motegno ka ionge luoro. Adier wiyi nowil gi chandruokni, Mana ka koth mochwe ochok ma wich osewilgo. Ngimani nobed maler moloyo ler mar odiechiengʼ, kendo mudho nochalni gi ler mokinyi. Inidag gi kwe maonge luoro, nikech geno ma in-go, kendo Nyasaye noriti mamiyi yweyo. Ininind kionge gi luoro, kendo ji mangʼeny nomany konyruok kuomi. To wenge joma timbegi richo biro jony kendo yore mag tony biro lalnegi; to geno margi biro lal nono.” Ayub odwoko Zofar Eka Ayub nodwoko kama: “Ayie ni un joma lich kendo angʼeyo ni ka utho to rieko bende nyalo tho kodu! Kata kamano an bende an gi paro machal gi ma un-go; kik upar ni afuwo. Uparo ni en ngʼa ma ok ongʼeyo weche ma uwachogi? “Asedoko gima inyiero e dier osiepena, kata obedo ni an ngʼama kare kendo maonge ketho; to chon an ema ne Nyasaye winjo ywakna kendo dwoka! Kuom mano, joma onge gi thagruok chayo joma thagore, kendo podho mar joma thagore ok lichnigi. Hembe mag jomecho onge ngʼama monjo, kendo joma jaro Nyasaye winjo maber, mana ka joma otingʼo nyasachgi e lwetgi. “To penj kata mana le kendo gibiro puonji, kata winy manie kor polo, to gibiro nyisi; kata wuo gi piny, to obiro puonji, kata inyalo yiene rech manie i nam mondo gipuonji. Mane kuom gigi duto mokia ni lwet Jehova Nyasaye ema osetimo ma? Ngima gimoro amora mochwe ni e lwete kaachiel gi much dhano duto. Donge it ema pimo kit weche mana kaka lep bende pimo mit chiemo? Rieko donge yudore e dier joma osedak amingʼa? Koso dak amingʼa donge kelo winjo tiend weche maber? “Nyasaye e wuon rieko gi teko; ngʼado rieko gi winjo tiend weche gin mage. Gima omuko mogoyo piny ok nyal ger kendo; kendo ngʼat motweyo ok nyal gony. Ka omako pige to oro mako piny; to koweyogi thuolo to giketho piny. En e wuon teko gi loch; joma iwuondo gi joma wuondo ji gin mage kargi duto. Omiyo jongʼad rieko bedo gi wichkuot kendo omiyo jongʼad bura doko joma ofuwo. Ogolo oko osimbo ma ruodhi orwako kendo otweyo pien gugru e nungogi. Omiyo jodolo bedo gi wichkuot kendo omiyo joma keregi osengirore podho. Omiyo jongʼad rieko mogen dhogi lingʼ thi kendo ogolo kuom jodongo rieko mar ngʼeyo tiend weche mopondo. Ochayo ruodhi kendo omayo roteke gigegi mag lweny. Ofwenyo gik matut mopondo ei mudho kendo okelo ler kuonde motimo mudho. Omiyo ogendini bedo gi teko, to bangʼe oloyogi mi otiekgi. Omiyo jotend piny bedo mofuwo; bangʼe to gibayo abaya ma girweny nono. Gidangʼni ei mudho maonge ler; kendo omiyo gikwangʼ ka joma omer.” “Wengena oseneno magi duto, kendo ita osewinjo tiendgi maber. Gima ungʼeyo, an bende angʼeyo; kik upar ni afuwo. To Jehova Nyasaye Maratego ema daher mondo awuogo kendo mondo anyis Nyasaye gik mane chunya. Un to uumo adiera gi miriambo; uchalo jothieth ma ok nyal thiedho tuo! Kudwaro nyiso ni uriek to mad koro ulingʼ alingʼa kar wuoyo! Koro winjuru ane gima awacho; chikuru itu ne ywakna. Ere gima omiyo uwuoyo marach kuom Nyasaye? Koso uparo ni miriambou biro konyo Nyasaye? Bende Nyasaye nyalo yie kodu kudwaro loko adiera bedo miriambo? Bende doyud adiera kuomu kononou? Bende duwuonde kaka uwuondo dhano? Obiro kwerou ratiro kapo ni udew wangʼ ji. Donge tekone biro goyou gi kihondko? Donge mbi mare biro bwogou? Ngeche muthoro mangʼenygo onge tich mana ka buch kendo; wecheu yomyom mana ka agulni mag lowo. “Lingʼuru kendo weyauru awuo; mondo gima dwaro timorenano otimre. Angʼo madimi abed e chandruok, ka atiyo gi ngimana mana kaka an ema ahero? Kata ka onega, to pod abiro keto genona kuome; omiyo pod abiro mana wacho wechena e nyime. Chutho, mano ema biro kelona resruok nikech onge ngʼama okia Nyasaye, manyalo hedhore michopi e nyime. Chik iti mos mondo iwinj wechena; kendo yie mondo iwinj gik ma awacho. Kaka koro aseikora dwoko wach makora, angʼeyo ni ubiro kwana kaka ngʼama kare. Bende ngʼato kuomu nyalo donjona ni an jaketho? Ka en kamano, to abiro lingʼ kendo kata tho ayie tho. “Yaye Nyasaye, yie itimna mana gik moko ariyogi mondo kik apondni. Gol lweti oko kuoma kendo iyie igolna masichegi mabwoga. Eka iluonga e nyimi kendo abiro dwoki, kata iyiena awuo mondo idwoka. Richo gi ketho adi ma asetimo? Nyisa kethona gi richona. Angʼo momiyo ipando wangʼi kendo ikawa kaka jasiki? It yien ayiena ma yamo teroni to isando nangʼo? Mihudhi motwo ma yamo tero, to ilawo nangʼo? Idonjona gi weche malit, moriw koda ka richo mane atimo kapod an rawera. Irido tiendena gi nyororo; kendo iluwo bangʼa e yorena maluwo duto, koketo kido e bwo tienda mondo onyis kamoro amora maluwo. “Omiyo koro dhano rumo mos mos kaka gima otop, mana ka nanga ma olwenda ochamo.” “Dhano ma dhako onywolo ndalone nok kendo oneno chandruok mathoth. Odongo piyo piyo ka maua bangʼe to oner; mana ka tipo makadho ma ok siki. Ngʼat machal kamano bende inyalo dewo? Bende dikele e nyimi adier mondo iyale? En ngʼa manyalo kelo gima ler kogolo kuom gima ochido? Onge kata achiel! Ndalo dhano nosekwan chon; isechano kar romb dwechene, kendo iseketo gikone ma ok onyal kalo. Omiyo gol wangʼi kuome kendo weye mos, mondo ochamie luche gi mor kaka ngʼama ondiki timo. “Yien ber nyalo bedo gi geno: ka osetongʼe to nitie geno ni onyalo loth, kendo chunye maloth manyien ok rem mak odongo. Kata obedo ni tiendene towo kendo miyo osikene tho, to kata kamano, kowinjo much pi, to oloth, mana ka yien mochako dongo. Dhano to tho kendo iike e bwo lowo; oyweyo mogik, kendo kare rumo chuth. Mana kaka pi dwono e nam kata kaka dier aora pi duone mi two, e kaka dhano nindo piny kendo ok ochak ochungʼ; ok ochak onen kendo bende ok nochiewe e nindoneno. “Mad ne ipanda ei liel mondo ne abed maonge nyaka chop mirimbi rum, bangʼe to iket kinde ma ibiro parae kendo! Ka ngʼato otho, bende dochak obed mangima kendo? Ndalona duto mag tichna matek abiro rito, an to abiro dhil gi thagruokna, nyaka kinde maber chopi. Ibiro luongo, kendo abiro dwoki; ibiro gombo neno chwech ma lweti osechweyo. Eka inikwan kuonde matienda onyono to ok inisik kinona mondo ikwan richo ka richo matimo. Kethoga ibiro ket ei ofuku mi din ma ok yawre, kendo inium richona. “Mana kaka pi ywero got kendo barore kendo kaka lwanda chorore kawuok kare, kendo kaka pi ywero kite kendo koth maduongʼ ywero lowo, kamano e kaka iketho geno ma dhano nigo. Ihewe dichiel kendo mogik, kendo olal nono; iloko kit wangʼe, kendo igole e dier ji chuth. Kata ka yawuote yudo duongʼ bangʼe, to en okia kendo kata ka giyudo wichkuot, to ok one gi wangʼe. Gima owinjo en mana rem manie dende owuon kendo oywagore kende owuon.” Elifaz odwoko Ayub Eka Elifaz ja-Teman nopenjo niya, “Bende ngʼama riek nyalo dwoko ji gi paro manono kata pongʼo it ji gi weche ma ok nikare? Bende onyalo mino wach gi weche maonge tiendgi, kata gi mbekni maonge gi konyruok? In to inyoso chuny ji mondo kik giluor Nyasaye kendo imonogi lame. Richo ma isetimo ema omiyo iwuoyo alanda kamano; kendo ilony e wacho miriambo. Wecheni iwuon ema ngʼadoni bura, to ok an, kendo gik ma lewi wacho ema nyiso kiti marach. “Iparo ni in e ngʼat mane okuong nywol e piny? Koso ne intie kapok Nyasaye ochweyo gode? Bende ichiko iti ne rieko mar Nyasaye? Koso iloko rieko giri iwuon? Angʼo mingʼeyo ma wan ok wangʼeyo? Paro matut mage ma in-go, ma wan waongego? Joma yie wigi otwi lwar kod joma hikgi ngʼeny moingo kata mana wuonu gin jokorwa. Hoch ma Nyasaye hoyigo kod weche mosebedo kinyisi gi ngʼwono, donge oromi? Angʼo momiyo iseweyo chunyi oteri mabor, mi ibedo gi wangʼ teko, momiyo koro iwuoyo gi Nyasaye ka in gi mirima kendo iwacho weche machalo kamano gi dhogi? “Dhano to en angʼo madimi obed ngʼama ler, koso dhano ma dhako onywolo, to en angʼo madimi obed ngʼama kare? Ka Nyasaye ok ogeno kata malaika mage, kendo kata mana polo bende ok ler e nyime, to koro ere kaka dodew dhano adhana ma timbene richo kendo okethore, mamodho richo ka pi! “Chikuru itu uwinja mondo olernu tiend wach; we anyisu gik ma aseneno, gik ma joma riek osehulo, ka ok gipando gimoro amora mane giyudo kuom kweregi, ma gin jogo mane omi piny kendgi giwegi kinde mane onge jopinje mamoko mane kadho e diergi. Ngʼat ma timbene richo kendo mathiro ji neno chandruok e kinde duto mag ngimane. Koko mag masiche opongʼo ite kendo jomecho biro monje e kinde moparo ni gik moko dhi maber. Ok onyal tony mowuogi e mudho; nikech okane ne ligangla. Orundore koni gi koni nimar en chiemb achudhe adier; ongʼeyo ni odiechieng mudho ni machiegni. Masiche malich ogoye gi kihondko, gigi duto omake, mana ka ruoth moikore mar dhi e lweny, mano ema notimre ne ngʼat ma kamano nikech othiano ni Nyasaye kendo opiem gi Jehova Nyasaye Maratego, koringo mondo odhi omonje kotingʼo kuot mapek kendo motegno. “Kata obedo ni ngʼatni chwe kendo en jamoko, to obiro dak e mier mokethore, kendo e udi maonge joma odakie, ma gin udi mosemukore molokore gunda. Koro ok obi bedo gi mwandu, kendo gik ma en-go ok bi dongʼ ne nyikwaye. Ok notony e masira, enochal gi yath ma mach owangʼo ite, kendo much Nyasaye biro keyo thiepene mi olal nono. Kik ogalre koketo genone kuom gima onge tich nikech onge ohala mobiro yudo kuom timo kamano. Obiro neno makne kapod ndalone oromo, kendo bedene ok bi siko ka ngʼich. Obiro chalo gi yiend mzabibu motengʼ olembene mapok ochiek piny mana ka yiend zeituni ma maupege two kendo lwar piny. Nikech riwruok mar joma ok lem ok nyal nyago gimoro kendo mach biro wangʼo hembe mag joma ohero asoya mitiek pep. Gin joma kelo chandruok kendo timo timbe maricho; kendo chunygi opongʼ gi miriambo kinde duto.” Ayub odwoko Eka Ayub nodwoko ni, “Asewinjo weche machal kamago mathoth; un duto un johocho ma chunygi odhier mogik! Wecheu moywarego biro rumo karangʼo? Koso utuo, momiyo usiko gi mino wach? Ka dabed ni un ema uwinjo marach kaka awinjoni, to an bende anyalo wuoyo mana kaka uwuoyono; dikoro arogonu gi weche ma ok rum kendo dikoro akinonu wiya. To dhoga dine ojiwou; kendo hoch mawuok e dhoga dine odwogo chunyu. “To kata awuo manade, to rem ma an-go medore ameda; to kata ka aweyo wuoyo to bende ok orum. Kuom adier, yaye Nyasaye, isedwoka piny mogik, isetieko joga duto pep. Isemaka kaka jasiki, mi adhero ma adongʼ choke lilo, kendo mano miyo ji paro ni an jasiki. Nyasaye ok dwara omiyo osegoyo denda gi tuoche magalagala ka en gi mirima kendo kokayona lake, ka wasika to juolona wangʼ-gi ka gisin koda. Ji ngʼamo dhogi ka gijara; Githalo lemba ka gisin koda, kendo ginur kuoma giduto ka giriwona. Nyasaye osejwangʼa e lwet joma timbegi richo adier Nyasaye osewita e lwet jo-mahundu. Gik moko duto ne dhina maber, to koro osetieka; mi omaka gi ngʼuta kendo otura matindo tindo. Osechoma tir; kendo aserni mage olwora koni gi koni. Gisechwoya mi iya oo piny e lowo, to eka pod ok okecha. Ohinyo denda kinde ka kinde; kendo omonja ka jalweny ma chunye okethore. “Asetwangʼo pien gugru mi arwako kendo asebuko lela wangʼa gi buru. Ywak osemiyo wangʼa olokore makwar, kendo wangʼa osiko neno mana mudho; to lwetena pok otimo tim mahundu kata dichiel kendo alamo Nyasaye gi chuny maler. “Yaye lowo, kik iyie iyik remba; mad ywak ma aywakgo kik rum! Kata mana sani ngʼat matimo nenda maber ni e polo, ngʼat mabiro chungʼ ka chwaka ni malo. Osiepena jara to pi wangʼa chwer ka akwayo Nyasaye mondo odwok lamona; okwayo Nyasaye kolamo kar ngʼama chielo mana kaka ngʼato nyalo kwechone osiepne. “Adongʼ gi higni matin nono, bangʼe to abiro dhi kama ok duogie. Chunya onyosore, ndalona ongʼad machiek, kendo thona ema chiegni koda. Jogo ma nyiera olwora koni gi koni; kendo asiko mana kaneno gero ma gin-go koda. “Yaye Nyasaye, nyisa gima idwaro. En ngʼa machielo mabiro rita? Isedino pachgi mondo kik gifweny adiera; omiyo ok ibi yie mondo gibed joloch. Ka ngʼato ondhogo osiepne mondo oyud mwandu to gima otimono nyaka dongʼ ewi nyithinde. “Nyasaye osemiyo abedo ngʼama ji duto goyo ngero kendo ma ka ji oneno to ngʼudho kuome olawo. Wengena koro ok nen maber nikech kuyo ma an-go; denda duto olokore choke lilo. Joma paro ni gin joma kare kibaji omako; kendo joma paro ni ler wacho ni ok angʼeyo Nyasaye. Kata kamano, joma kare nosik koluwo yoregi makare, kendo joma yoregi oriere nomed bedo motegno. “Un duto weyauru kendo dhiuru mabor nikech ok aneno ngʼama riek kuomu-ka. Ndalona osekadho, chenrona duto osekethore, kaachiel gi gik moko duto ma chunya gombo. Jogi loko otieno mi bed odiechiengʼ; ka piny otimo mudho to giwacho ni, ‘Ler ni machiegni.’ Ka dipo ni dala ma ageno dhiye en mana liel kende, kata kapo ni apedho kitandana e mudho, ka dipo ni awacho ne kethruok ni, ‘In e wuonwa,’ kendo aluongo kudni ni, ‘minwa,’ kata ni, ‘nyamera,’ to koro geno mara ni kune? En ngʼa manyalo neno geno moro amora ma an-go? Bende dodhi piny nyaka e dhorangeye mag tho? Koso bende dwalor kode nyaka ei lowo?” Bildad odwoko Ayub Eka Bildad ja-Shua nodwoko niya: “Ibiro weyo weche miwachogi karangʼo? Bed ngʼama odimbore eka wawuo. Angʼo momiyo ikawowa ka dhok kendo wachalo joma ofuwo e nyimi? Mirima ma in-gono biro hinyi mana in iwuon, iparo ni piny biro rumo nikech in? Koso nyaka gol lwendni kuonde magintie? “Tach joma timbegi richo osenegi; kendo mae oseweyo liel. Ler manie hembe oselokore mudho; kendo taya manie bathe osetho. Chon nowuotho motegno, to tinde oywayo wuoth, riekone owuon ema omiyo opodho. Tiendene osetere ei gogo kendo koro orundore e iye. Obadho osemako ombongʼne; kendo oride matek ma ok onyal bwodho. Ochike gi otegu mopandi ei lowo kendo oket ne obadho e yo moluwo. Masiche onure koni gi koni kendo okete ka gi ka. Midhiero oikore mar chame kendo chandruok okichore mar muonye sa ma opodho. Tuo marach omako dende duto, kendo miyo bedene kod tiendene kethore. Oseywae oko mogole e hembe kama ne odakie gi kwe, motere nyaka e nyim ruodh chandruok. Gimoro amora mane entierego koro onge e hembe; nikech mach mager osewangʼo kar dakne. Jarichono chalo gi yath ma tiendene otwo ei lowo, kendo bedene oner. Humbe rumo e piny; kendo onge ngʼama nochak opare. Oriembe ogole e ler mi otere e mudho, kendo humbe orumo e piny. Oonge gi nyithinde kata nyikwaye e dier ogandane, kata ngʼama nodongʼ kama yande odakie. Ka joma nodak yo podho chiengʼ nowinjo gima notimoreno luoro nomakogi, to joma odak yo wuok chiengʼ, kihondko nogoyo. Chutho mago e gik matimore ne joma timbegi richo mokia Nyasaye.” Ayub odwoko Bildad Eka Ayub nodwoko niya, “Ubiro chando chunya nyaka karangʼo ka uchuoya gi weche? Koro useyanya nyadipar kendo uonge gi wichkuot ka umonja. Kapo ni en adier ni asebaro mabor, to mano obadhou gangʼo. To kapo ni unyalo tingʼoru malo moloya kendo uchuoya gi wach nikech chandruok ma an-go, to kara ngʼeuru ni Nyasaye osechwanya kendo gogo mare osemaka. “Ka aywak ni, ‘Itimona marach!’ Onge ngʼama dewa; to kata ka adwaro kony, to ok anyal yudo. Osedino yorena ma ok anyal kalo; kendo osemiyo kuonde maluwo otimo mudho. Osemaya duongʼna mi ogolo osimbo e wiya. Oseturo denda duto motieka kendo opudho genona ka ngʼama pudho yien. Mirimbe maliel ka mach ni kuoma; kendo okwana kaka achiel kuom wasike. Jolweny mage pangore kochoma gi tekregi duto; gigona agengʼa ka gidwaro kedo koda, kendo giguro hembegi e alwora mar dalana. “Osepoga gi owetena monywolago; kendo jogo mosiepena bende oseringo oweya. Anywolana oseringo oweya; kendo osiepena wigi osewil koda. Wenda gi jotichna ma nyiri kwana kaka ngʼat ma gikia; kendo ginena kaka japiny moro. Ka aluongo jatichna moro kata bed mana ni asaye gi dhoga awuon, to ok odewa. Chiega ok dwar winjo tikna; kendo kata mana owetena bende ok dwar sudo buta machiegni. Nyaka yawuowi matindo bende jara; kendo ka ginena, to ginyiera. Osiepena mageno ok dwara; jogo mane chunya ohero bende ok dwara. Adhero mi adongʼ choke lilo; kendo gima adongʼ-go en mana ring laka. “Kechauru, yaye osiepena, kechauru, nikech lwet Nyasaye osetieka. Angʼo momiyo ulaworu koda kaka Nyasaye lawa? Sando ringra pok oromou? “Yaye, mad ne ngʼato mak wechegagi, kendo ndikgi e kitabu, kata ndikgi gi kalamb chuma, kata ne gorgi e lwanda kama ok ginyal ruchoree! Angʼeyo ni Jawarna nitie kendo ngima, kendo chiengʼ giko nochungʼ kongʼado bura ne piny. Kata ka tuo oketho denda kamano, to e ringruogni anane Nyasaye. Adier, ananene gi wangʼa awuon mana an ma ok ngʼat moro. Mano kaka chunya ogeno odiechiengno! “Ka uwacho ni, ‘Mano kaka udhi nyime kungʼadona bura, mana ka gima oseyala moseyudi ni an jaketho,’ to un bende asiemou ni ibiro kumou; nikech paro marach ma un-gono, eka unungʼe ni nitiere chiengʼ ngʼado bura.” Zofar odwoko Ayub Eka Zofar ja-Namath nodwoko niya, “Pacha chuna ni nyaka adwoki nikech gima iwacho chando chunya. Asewinjo kwer mikwerago, manyisa ni ichaya, omiyo kaluwore gi ngʼeyo ma an-go, to chuna ni nyaka adwoki. “Ingʼeyo maber chal gik moko nyaka aa chon, chakre kinde mane oket dhano e piny, ni tingʼruok ma joma timbegi richo tingʼorego rumo piyo, kendo mor mar joma okia Nyasaye ok bed amingʼa. Kata bed ni sungane chopo nyaka e polo kendo wiye mulo boche polo, to ibiro yweye molal nono mana ka buru; joma yande ongʼeye nopenj ni, ‘Kare tinde erego?’ Olal nono mana ka lek, kendo ok chak yud ndache iriembe modhi mabor, mana ka lek mar otieno. Wenge ma yande nene ok nochak onene; kendo kama nodakie ok nochak onene. Nyithinde nyaka dwok gik mane okwalo kuom jodhier, adier nyithinde nyaka dwok mwandu mane omayo ji. Tekone duto kaka ngʼama pod tin biro dhi kode e bur. “Kata obedo ni richo mitne e dhoge mopando moko e lembe, kata obedo ni ok onyal pogore kode kendo okane ei dande iye, to chiembe biro lokore makech gie iye; obiro lokore kwiri marach mag thuonde madongo manie iye. Nyasaye biro ngʼulo mwandu mane omwonyo oko; obiro miyo ongʼogogi oko ka chiemo mocham. Obiro nyodho kwiri mag thuonde madongo; kendo leke thuond fu man-gi kwiri maricho biro nege. Ok enobed mangima ma one mo mar kich gi chak mamol ka aore. Gik mane oyudo kuom tichne matek obiro weyo kendo ok obi yudo thuolo mar bedo mamor kuom ohala mosechoko. Nikech ne othiro joma odhier, kendo nomayogi gigegi mi gidongʼ nono osemayo ji udi ma en ne ok ogero. “Adier, ok obi yudo yweyo kuom gombone malach; nikech ok onyal warore owuon gi mwandu mangʼeny mokano. Onge gima odongʼne makoro onyalo yako; mwandune ok bi siko. Kata bed ni oseyako mwandu mangʼeny kamano; to mwandugo ema biro kelone masira; kendo midhiero maduongʼ biro biro kuome mi hewe. Kosechiemo moyiengʼ, to Nyasaye biro olo kuome mirimbe maliel ka mach, kendo biro kelo kuome kum malich. Kata otem ringo mondo otony ne gir lweny molos gi chuma, to asere ma dhoge olos gi mula biro chwowe. Opudho asereno mondo owuog oko gi yo ka die ngʼeye, ka lew asere mabithno to osechwoyo adundone. Kihondko biro biro kuome, nikech mwandune duto oserumo. Mach ma lwet dhano ok omoko biro wangʼe molokre buru kendo biro tieko gimoro amora modongʼ e hembe. Polo biro bedo janeno kuom timbene mamono duto; to piny nongʼadne bura. Ohula maduongʼ biro yweyo ode mi dhigo, adier, pi maringo matek biro tere chiengʼ ma Nyasaye noolie mirimbe mager. Mano e gima Nyasaye ochano ne joma timbegi richo, mano e girkeni ma Nyasaye oikonegi.” Ayub odwoko Zofar Eka Ayub nodwoko niya, “Chikuru itu mondo uwinj wechena; yie utimna ngʼwono mondo uwinja. An bende miyauru thuolo mondo awuo, to ka asetieko wuoyo, to udhi nyime gijara. “Uparo ni aywagora ne dhano? En angʼo ma dimi abed mos? Rangauru ane ka ok dubwogi; kendo ka ok dumak dhou ka uhum. Ka aparo kuom kaka achal, to angʼengʼ angʼengʼa; kendo denda duto tetni. Angʼo momiyo joma timbegi richo ngima angima, angʼo momiyo gidak amingʼa, kendo tekregi osiko medore ameda? Nyithindgi dongo maber mi bed gi keregi e diergi kendo nyikwagi bende nyaa ka pod gingima. Miechgi oriti maber maonge gima bwogogi; kendo kum mar Nyasaye onge kuomgi. Rwethgi koluwo dhok mamon to nyaka nywol; dhogegi nywolo nyiroye madongo duto kendo onge minywolo kobwogi. Nyithindgi wuotho kanyakla ka jamni; to nyithindgi matindo giro ka nyiroye. Giwer ka gigoyo oyieke gi asili; kendo gimiel ka gigoyo orutu. Piny dhi kodgi maber higa ka higa, kendo githo ka gin gi kwe. To gingʼanyone Nyasaye kagiwacho niya, ‘Wewa mos!’ Waonge gi gombo moro amora mar ngʼeyo yoreni. Jehova Nyasaye Maratego to en ngʼa, ma dwatine? Koso en ohala mane mwabiro yudo kwalame? Kata kamano mwandugigo ok giyudo gi tekregi giwegi, emomiyo apogora mabor gi pach joma richogo. “To kata kamano, donge joricho manok ema tho piyo? Donge ji matin kuomgi kende ema masira mako; ma en masira ma mirimb Nyasaye ema okelo? Bende gi chalo gi lum ma yamo yiengo, kata gi mihudhi ma yamo tero? Wachore ni Nyasaye kano kum monego okumgo ngʼato ne yawuote. An to awacho ni ber moloyo ka Nyasaye okumo jaketho owuon, mondo eka ngʼama oketho opuonjre. Ber mondo one chandruok ma en owuon ema okelo; kendo mondo orom gi Jehova Nyasaye Maratego. Nimar ok lichne kata ka otho moweyo joge ka giko ndalo mar ngimane ochopo. “Bende nitiere ngʼama nyalo ngʼadone Nyasaye rieko, ka en owuon ema ongʼado bura nyaka ne joma ni malo mogik? Ngʼat moro tho ka pod otegno kodak maber kendo owinjo maber chuth, ka dende orito maber, kendo chokene otegno. To ngʼat machielo to tho ka chunye opongʼ gi lit, ma ok oneno ber moro amora e ngimane duto. Kata kamano giduto iyikogi machalre e lowo kendo kute nur kuomgi machalre. “Angʼeyo maber gik ma uparo, angʼeyo gik muchano e chunyu mondo ukinyago. Uwacho niya, ‘Dak koro wane od ruodheno, hembe mane joma richo odakiego koro ere?’ To donge usepenjoe joma osedak amingʼa? Pod ok uyudo konyruok kuom weche ma gisebedo ka ginyisou, ni ngʼama rach tony ka masira obiro kendo ni iresega chiengʼ mirima? En ngʼa makwere e wangʼe koketho? Koso ngʼa machule kuom gima osetimo? Chiengʼ ma iyike e liel to liende irito maber. Sa ma idhi yike to ji duto kowe, kendo lowo lwar kuome mos. “Ka en kamano, to kara koro ere tiende hoya gi wecheu manonogo? Onge adiera kata achiel modongʼ kuom dwokougo, makmana miriambo lilo!” Elifaz odwoko Ayub Eka Elifaz ja-Teman nodwoko niya, “Dhano adhana to konyo Nyasaye gangʼo? Kata bed ni ngʼato riek mogik, angʼo ma dokonygo Nyasaye? Ere ohala ma Jehova Nyasaye Maratego yudo kibedo ngʼat makare? Koso iparo ni ka yoregi oriere, to mano konye gangʼo? “Iparo ni Nyasaye kwedi kendo kumi nikech in ngʼama kare? Donge otimoni kamano nikech timbegi kod richo misetimo ngʼeny? Ne ikawo lep oweteni kaka gir singo miweyogi duk; eka mondo gichuli mwandu mane gikawo kuomi. Ne ituono joma ool pi modho kendo ne ipando chiemo ne joma odenyo, ne itimo kamano kata obedo nine in ngʼama duongʼ, ne in gi lopi iwuon midakie, kendo ji noluori. Ne ok ikonyo mon ma chwogi otho kendo nyithind kiye bende ne ithago. Mano emomiyo obadho oluori moketi diere kendo masira mabiro apoya ochomi. Mano emomiyo mudho olwori ma ok inyal neno kendo chandruok malich olwori. “Donge Nyasaye odak e polo malo? Donge en malo moyombo nyaka sulwe man malo mogik? To eka in iwacho ni, ‘Nyasaye to ongʼeyo angʼo? Ere kaka onyalo ngʼadonwa bura to boche polo oime? Boche mogingore oime, omiyo ok onyal nenowa seche mowuotho koni gi koni e kor polo.’ Idwaro siko e yore machon kuonde ma joma richo osewuothe, ma gin joma ne kargi olal nono kapok ndalogi ochopo kendo ma mise margi ne ohula oywero modhigo? Negiwachone Nyasaye ni, ‘Wewa mos!’ En angʼo ma Jehova Nyasaye Maratego nyalo timonwa? To eka Nyasaye ema ne opongʼo utegi gi gik mabeyo, omiyo an apogora gi rieko ma joma timbegi richo ngʼado. Joma kare neno masira to pod gimor amora, to joma pok otimo gimoro amora marach jarogi, kagiwacho niya, ‘Adier, wasikwa osetieki, kendo mach osewangʼo mwandugi motieko pep!’ “Chiwri ni Nyasaye mondo ibed kode gi kwe, ma biro miyo idhi nyime maber. Rwak puonj mowuok e dhoge kendo kan wechene e chunyi. Ka idok ir Jehova Nyasaye Maratego, to ibiro geri kendo. Ka igolo timbe maricho mabor gi dalani, kendo ka ikawo kitegi ma nengogi tek ka gima nono kendo ok ikwano dhahabu magi mabeyo mokuny Ofir ka gima gin lwendni manie rogo, eka Jehova Nyasaye Maratego nobed dhahabu mari, kendo nobedni fedha maberie mogik. Adier, iniyud mor kuom Jehova Nyasaye Maratego kendo inichom wangʼi kuom Nyasaye. Inilame kendo enowinji, kendo inichop singruok duto mane itimo. Gimoro amora michano timo biro dhi maber, kendo yoreni miluwo nobed maber. Ka ji jaro jowetegi kendo ikwayo Jehova Nyasaye ni, ‘Resgi!’ to Jehova biro reso joma ijarogo. Obiro resi kata ngʼama onge ketho; ngʼat ma kamano ibiro reso nikech in ngʼama kare.” Ayub odwoko Elifaz Eka Ayub nodwoko niya, “Kata kawuono pod aywagora ka an gi chuny malit; nikech kum mapek ma Nyasaye oketo kuoma miya achur ka an gi rem malich. Ka dine bed ni angʼeyo kuma dayudie Nyasaye; kendo kata dabed ni anyalo dhi nyaka kuma odakie; to dine aterone ywakna, kendo anyise gik mopongʼo chunya, mondo afweny gima doduoka kendo angʼe gima onyalo wacho. Bende doti gi tekone maduongʼ mondo okweda? Ooyo, ok dochun weche kuoma ni an jaketho. Kuno ema ngʼama ja-adiera teroe ywakne, kendo kuno ema jal mangʼadona bura diweyae thuolo. “To kata ka adhi yo wuok chiengʼ to oonge kuno; ka adhi yo podho chiengʼ bende ok ayude. Ka odich otiyo yo nyandwat, to ok anene; to ka olokore ochomo yo milambo to kuno bende ok anyal nene. To ongʼeyo yora maluwo; bangʼ tema to abiro wuok aa e tem ka achalo dhahabu. Tiendena osebedo kaluwo okangene adimba; asebedo ka aluwo yorene ma ok abar. Pok aweyo mak aluwo chike mowuok e dhoge; to asekawo weche mowuok e dhoge kaka mwandu maduongʼ moloyo chiemba mapile. “En to ochungʼ kar kende, koso en ngʼa madipiem kode? Otimo gima en owuon ema ohero. Obiro chopo gima nosechano chon, kendo pod en gi chenro machal kamago mokanona mathoth. Mano emomiyo kibaji maduongʼ omaka e nyime, kendo kaparo gigi duto to amiye luor. Nyasaye osemiyo chunya ool; Jehova Nyasaye Maratego osemiyo kibaji omaka. Kata bed ni mudho odino wangʼa kamano, to mudhono ok nyal miya luoro. “Angʼo momiyo Jehova Nyasaye Maratego ok oketo odiechieng ngʼado bura mondo ongʼere? Angʼo momiyo joma ongʼeyo geno odiechiengno to ok ginyal nene? Ji ma timbegi richo ketho kiewo; kendo gikwayo jamni ma gisekwalo. Gikwalo punda nyathi kich kendo gikawo rwadh pur achiel kende mar dhako ma chwore otho ka gir singo. Gimono jochan yudo adiera kendo gimiyo jomodhier ringo pondo. Joma odhier tiyo matek kamanyo chiemo e thim, mana ka punda; nikech onge kama ginyalo yudoe chiemo ni nyithindgi. Gichoko chiemb jamni kendo gihulo mzabibu e puothe joricho. Ginindo duk gotieno nikech gionge lewni; gionge gimoro amora ma ginyalo umorego ka koyo ngʼich. Kodh ajiki mag gode olwoko dendgi kendo gitwere e lwendni nikech gionge kuonde dak. Nyathi maonge gi wuon iyudho oko e thuno; nyathi jadhier ma pod kwar imako kar gowi. Giwuotho duk e gwengʼ nikech gionge lewni; gitingʼo ne ji chiemo to gin to kech negogi. Ji chunogi gitoyo zeituni kuonde ma gin ema gikunyo, kendo gibiyo olemb mzabibu to gin riyo negogi. Chur mar joma tho ochomo polo koa e dala maduongʼ kendo chunje joma ohinyore ywagore ka dwaro kony, to Nyasaye ok okum joma hinyogi. “Nitie jomoko mangʼanyo ne ler, ma ok ongʼeyo yore ler, kata ma ok dwar ler. Ka ler mar odiechiengʼ rumo aruma nii, to janek aa malo kendo onego jochan gi jodhier; otimo kamano gotieno kolidho ka jakuo. Wangʼ jachode bende rito mondo piny oimre; oparo e chunye niya, ‘Onge ngʼat ma biro nena,’ kendo opando wangʼe mondo kik ngʼeye. Jokuo turo udi gotieno, to kochopo odiechiengʼ to gipondo; nimar ok gidwar neno ler. Giduto mudho mandiwa chalnegi okinyi; giloso osiep gi masiche mayudore e mudho mandiwa. “To kata kamano gichalo buoyo moyienyo ewi pi malo; lopegi okwongʼ, maonge ngʼama rawo e puothegi mag mzabibu mi yudie olemo. Joricho lal nono e piny ma ji odakie, mana kaka pe leny ka chiengʼ rieny e ndalo oro. Onge ngʼama paro joricho kendo wich wil kodgi; mi kudni chamgi kendo itiekogi chuth. Gisando mon ma chwogi otho kendo ok gikech mon maonge nyithindo. To Nyasaye tieko joma roteke gi tekone; kata obedo ni gin joma niginyalo to gionge gi ratiro ni gibiro bedo mangima. Onyalo weyogi mi gipar ni gin gi kwe, to wangʼe osiko rangogi kinde duto. Gineno maber kuom kinde matin kende to bangʼe gilal nono kadiemo wangʼ, kendo ichokogi mi giner ka buya mopudhi; kendo ingʼadogi oko mana kaka ingʼado wiye cham. “Ka gik ma awachogo miriambo, to en ngʼa manyalo nyiso maler ni ariambo, ma dimi wechega bed gik manono?” Bildad odwoko Ayub Eka Bildad ja-Shua nodwoko Ayub niya, “Loch gi luor gin mag Nyasaye; okelo kwe e piny koa e polo. Bende nitiere ngʼama nyalo kwano jolweny mag Nyasaye? En ngʼa ma ok nyal neno ler Nyasaye karieny? Ka en kamano, to ere kaka dhano dibed ngʼat makare e nyim Nyasaye? Koso ere kaka dhano ma dhako onywolo nyalo bedo maler? To ka kata mana dwe ema ok rieny maler bende kata mana sulwe ok ler e wangʼe, to koro ere kaka dhano ma kudni akudani dichal e nyime?” Ayub odwoko Bildad Eka Ayub nodwoko niya: “Mano kaka usekonyo joma onge teko! Mano kaka usereso joma yomyom! Mano kaka usengʼado rieko ne ngʼama onge gi rieko ka an kama, kendo uyie puonjo ngʼama ofuwo ka an kama! En ngʼa mosemiyou rieko mar wuoyo kamano? Koso en paro mane ma un-go momiyo wechego wuok e dhou? “Piny joma otho tetni, kendo ji duto man kuno luoro malich omako. Piny joma otho ok opondo ne Nyasaye; kendo onge gima nyalo mone nene. Oyaro polo man yo nyandwat mi oumgo kama ninono; kendo oliero piny ewi gima onge. Nyasaye ema pongʼo boche polo kod pi, kendo omono pek mar pigno yiecho bochego. Oumo wangʼ dwe mopor, koyaro bochene mondo ogengʼe. Ogoro giko wi piny ewi pige kaka kiew mar ler gi mudho. Sirni mag polo yiengni kendo kokwerogi to gilingʼ thi. Ne ochoko pige mag nam gi tekre owuon; kendo kuom riekone ne otieko Rahab. Muche ema nomiyo polo olendo; kendo lwete ema ne onegogo thuol mane oyudo ringo tony. To magi gin mana dir tijene ma oko kende; kendo gin mana gik manok kende mikuodho kuome! Koro en ngʼa mongʼeyo gima Nyasaye nyalo timo gi tekone?” Ayub nochako wuoyo kendo mowacho niya, “Akwongʼora gi nying Jehova Nyasaye Maratego mosetamore ngʼadona bura makare, kendo mosemiyo chunya obedo malit, bende asingora ni kapod angima kendo kapod Nyasaye omiya muya ma ayweyo, to dhoga ok nowach gimoro marach, kendo lewa ok nowach miriambo. Ok abi yie ngangʼ ni un kare; ok anasiki mana ka awacho ni aonge ketho nyaka atho. Abiro siko mana ka awacho ni an kare ndalona duto; kendo pacha ler e wachni e ndalo duto. “Mad wasika duto mapiem koda, yud kum mana ka joricho! Koso geno mane ma ngʼama ok ongʼeyo Nyasaye dibedgo ka ongʼad ndalone, kendo ka Nyasaye okawo ngimane? Bende Nyasaye chiko ite ne ywakne ka masira obirone? Bende onyalo bedo gi mor kuom Jehova Nyasaye Maratego? Bende doywagne Nyasaye seche duto? “Abiro puonji kaka teko Nyasaye chalo; ok abi pandoni yore mag Jehova Nyasaye Maratego. Un duto ngʼato ka ngʼato useneno ma gi wangʼu koro weche manonogi to uwacho nangʼo? “Chandruok ma Nyasaye ochano ne ngʼama timo timbe mahundu, kendo girkeni mar ngʼama timo timbe marichogo yudo koa kuom Jehova Nyasaye Maratego ema: Kata ne bed ni nyithinde ngʼeny manade, to ligangla ema ochomogi; kendo nyithinde ok noyud chiemo moromogi nyaka chiengʼ. Tuo noneg joma otony e lweny, kendo mon ma chwogi otho ma giweyo ok noywag-gi. Kata jaricho chok fedha mangʼeny manade, kod lewni bende mangʼeny, to gik mochokogo joma kare ema biro rwako, kendo joma onge ketho nopogre mwanduge mag fedha. Ot mogero yomyom ka mbuyi mar otiengʼ, kata ka abila ma jarito ogero. Onindo ka en gi mwandu, to ochiewo gi lwete nono; ka wangʼe yawore nii to mwandune duto oserumo. Masiche nomakgi ka ohula motuch apoya; kendo yamb otieno nokegi mabor. Yamb ugwe tingʼe midhi kode, mi olal nono; oywere mi ogole kare. Enogo kuomgi koko matek ma ok oweyonigi thuolo, kolawogi matek gi tekone maduongʼ. Yamo nokudh kuomgi ka giringo kendo tekone malich nomi kihondko makgi.” “Nitie kama ikunyoe fedha kod kama ilenyoe dhahabu. Chuma ikunyo koa e lowo, kendo mula ilenyo kigolo kuom kite. Ji kunyo kite ma nengogi tek kuonde matut mogik kendo motimo mudho, omenyo nyaka ei buche maboyo miwuoro, nyaka kuonde molil ti, mondo onwangʼie kite mabeyo. Opowo kor gode modhi mabor gi kuonde ma ji odakie, mochop nyaka kuonde ma ji ok wuothie; ka giliero e tonde marundore koni gi koni. Lowo e kama chiemo wuokie, to pinyne ibaroe lwendni gi mach. Lwendinigo ema kite ma nengogi tek miluongo ni Safir wuokie kendo buru ema otingʼo dhahabu. Kuom winy machamo ringʼo, onge moro amora mongʼeyo yore manie buchego, kendo onge achuth mosenene gi wangʼe. Ondiegi mager pok nowuotho kuondego, kendo kata sibuor pok oruto kuno. Ji baro lwanda matek ka chuma kendo thulo gode oko gie tiendegi. Otucho kor lwanda; mi wengene ne mwandu duto manie kor gode. Omanyo kuonde ma aore ochakoree, mi okel gik mopandi e lela. “To rieko to diyud kanye? Koso ere kuma ngʼeyo wuokie? Dhano mangima ok ongʼeyo kaka iyude; kendo ok oyudre e piny joma ngima. Kut wacho ni, ‘Oonge e iya;’ to nam wacho ni, ‘Oonge koda ka.’ Ok nyal ngʼiewe gi dhahabu maler mogik kendo nengone ok nyal pim gi fedha. Ok nyal ngʼiewe gi dhahabu mokuny Ofir, kata gi kite ma nengogi tek kaka Oniks kata Safir. Dhahabu kata kite mamil ma nengogi tek ok nyal pimego bende ok nyal pime gi gima olos gi dhahabu. Kit nam ma nengone tek kod kit ombo marieny ok di wuo kuomgi nikech nengo rieko oyombo nengo kit rubi maratiglo. Kata mana kit topaz mokuny Kush28:19 Nying Kush machielo en Ethiopia. ok nyal pim kode; ok nyal ngʼiewe gi dhahabu malerie mogik. “To rieko to diyud kanye? Koso ere kuma ngʼeyo wuokie? Opondo ne wenge gik mangima duto, kendo opande koda kane winy mafuyo e kor polo. Kethruok gi tho jowacho ni, ‘Humbe kende ema osechopo e itwa!’ Nyasaye ema ongʼeyo yo miyudego kendo en kende ema ongʼeyo kama odakie, nikech wengene okwako tungʼ piny gi tungʼ piny kendo oneno gimoro amora manie bwo polo. Kane oguro teko mar yamo kendo opimo giko nembe, kane ogolo chik ne koth kendo ogoro yor mil polo, e kinde mane onenoe rieko mi opimo berne kaka chalo mi onwangʼo. Kendo nowachone dhano ni, ‘Luoro Ruoth Nyasaye kelo rieko, kendo ka idwaro bedo gi ngʼeyo to nyaka iwe richo!’ ” Ayub nomedo wuoyo kawacho niya, “Yaye, mad ngʼato dwoka e ndalona machon kendo kinde mane Nyasaye orita maber, ka en koda kuonde duto kendo ka lerne ne menyona kuonde motimo mudho mane awuothe! Ee, mano kaka agombo ndalogo mane pod ategno, kinde mane Nyasaye gwedho oda nikech ne en osiepna, ma en ndalono ma Jehova Nyasaye Maratego ne pod ni koda kendo nyithinda noketa diere, ne en ndalo ma yorega ne dhi maber kendo yiende mag zeituni ne nyak maber. “Kindeno kane adonjo gie ranga dala mi abet e koma ei paw bura, to yawuowi ne weyona yo ka onena to jodongo to ne oana malo. Jotend ogendini ne weyo wuoyo, kendo negilingʼ thi ka giumo dhogi. Ruodhi kane onena to ne wuoyo gi dwol mapiny kendo onge ngʼama ne nyalo winjo gima negiwacho. Ngʼato angʼata mane owinja ne loso maber kuoma, kendo joma nonena ne pwoya, nikech ne akonyo joma odhier mane ywak ka dwaro kony, kod joma onge wuonegi mane onge gi joma dikonygi. Ngʼama ne chiegni tho nogwedha; kendo namiyo chuny dhako ma chwore otho duogo mi ower gi mor. Arwako tim makare kod adiera ka lepa. Ne abedo wangʼ muofni kendo tiende pudhe. Ne abedo wuon jochan; kendo ne akawo chandruok joma welo. Ne aketho teko mar joma thiro ji mi agologi e lwet joma dwaro hinyogi. “Ne aparo e chunya ni, ‘Tho biro kawa mos ka adak maber e dalana, kendo ka hika mae pinyni oniangʼ, Achalo gi yath, madongo e bath aora madongo ka ngʼich nikech tiendene ochwo pi kendo thoo biro bedo e bedena gotieno. Huma mara biro siko kalandore kendo tekra nosiki!’ “Ji ne chikona itgi ka geno konyruok mathoth, negirito rieko mawuok e dhoga ka gilingʼ mos. Onge ngʼama ne loso bangʼa; wechena ne lwar e itgi mos ka ngʼidho. Ne girita ka joma rito koth ndalo oro, kendo negimor gi wechena mana ka joma rito kodh chwiri. Kane abwonjo kodgi to ne amako dhogi; kendo ler mane rieny koa e lela wangʼa, ne morogi ahinya. An ema ne anyisogi yo monego gilu kendo nabedo kaka ruodhgi; ne achalo ruoth e dier jokedo mage; bende ne achalo ngʼat mahoyo joma ywak.” “To sani koro gijara, kata obedo ni gin jomatindo ahinya kuoma, ma kata mana wuonegi ne ok anyal yienegi kata mana konyo guogi rito jamba. Ne gin joma tekregi oserumo kendo manyap ma ok nyal timona gimoro amora. Negineno malich nikech chan gi kech mane gin-go kendo ne gidangʼni koni gi koni gotieno e piny motwo, kendo e piny mokethore modongʼ gunda. Negibayo ei thim koni gi koni ka gimanyo chiemo, kendo tiende yien maonge ndhandhu ema nobed chiembgi. Ne iriembogi gi mahu mana ka gima gin jokwoge. Nyaka ne gidag mana e aore modwono, kendo ei rogo mag lwendni. Ne giywak e bunge mana kondiegi kendo ne gilak ei bunge. Ne gin joma nono maonge nying, omiyo noriembgi gia e piny. “To koro yawuotgi jara ka giwer, makoro aselokora ngero ma gigoyo e kindgi. Gisin koda kendo ok gidwara butgi; ok lich negi kata ka gingʼulo olawo e wangʼa. Sani koro gimwomore kuoma nikech Nyasaye osetieko tekrena kendo ogoya gi masira. Jonjoregi monja gie batha korachwich; gichikona obadho, kendo gikunyona buche mondo apodhie. Giketho yora, gidwaro tieka chuth. Giwacho ni, ‘Onge ngʼama nyalo konye.’ Gidonjo kuoma ka pi madonjo e hotogoro maduongʼ kata ka joma muomo ohinga kama ogore piny. Masiche oola; mi duongʼna osekadho ka yamo, kendo kwe ma an-go osekadho ka boche polo. “Sani koro ngimana rumo mos mos; kendo chandruok omaka. Kochopo otieno to chokena muodore amuoda, kendo rem ma an-go ok miya yweyo. Nyasaye ngʼwana gi ngʼuta kuom chandruok mangʼeny ma asebedogo kendo tuo noketho denda, machalo mana gi nanga morido ngʼuta matek. Ne owita nyaka ei chwodho, mi alokora buru. “Aywagorani, yaye Nyasaye, to itamori dwoko; achungʼ e nyimi to ingʼiya angʼiya. Ilokona kiti kendo ibedo mager koda; isanda gi badi maratego. Iyudha kendo iliera e kor yamo, irunda ewi apaka. Angʼeyo ni ibiro tera nyaka e tho, nyaka kama ochan ne joma ngima duto. “Ongʼere ni ngʼama osehinyore ok nyal monj kendo, to oywak mana ni mondo okonye e chandruokne. Donge aseywago joma ni e chandruok? Donge chunya bedo malit kaparo jodhier? Ne ageno yudo mor kod ler; to rach kod mudho ema nobirona. Iya nyawni ma ok rum; kendo ndalo mag chandruok ema ochoma. Pien denda lokore maratengʼ to ok nikech chiengʼ marieny matek; achungʼ e dier chokruok, kendo aywak mondo okonya. Achalo ngʼama nonywol kaachiel gi ondiegi, bende achalo osiep tula. Pien denda olokore ratengʼ kendo opokore; kendo wich bar oowo denda ka mach. Thuma mar nyatiti olokore gir kuyo, kendo asili mara olokore gir dengo. “Ne atimo singruok gi wangʼa mondo kik arang nyako moro gi wangʼa mi agombi. En kony mane ma dhano yudo kuom Nyasaye man malo, girkeni mane ma Jehova Nyasaye Maratego man malo miye? Donge kethruok en mar joma timbegi mono, kendo masira mar joricho? Donge oneno yorena kendo okwano okangena? “Kapo ni asewuotho e yor miriambo kata ka tienda osereto kadhi wuondo ngʼato, to Nyasaye mondo opima e ratil madier kendo obiro yudo ni aonge ketho, kendo kapo ni tienda osebaro moweyo yo, kata wengena osewuondo chunya, kata ka gimoro osechido lwetena, to kara joma moko ema ocham gik mochiek e puotha, kendo chamba mondo opudh oko. “Kapo ni chunya osegombo dhako moro, kata kapo ni asebuto karito chi ngʼato, to kara chiega otine dichwo machielo, kendo chwo mamoko oterre kode. Nikech mano en tim wichkuot maduongʼ kendo en richo marach manyaka kum, nimar ochalo mach marach mawengʼo manyalo tieko giga duto ma an-go. “Kapo ni asetamo jotichna machwo gi mamon e adieragi kane gin koda gi wach, to angʼo ma datim ka Nyasaye ochoma tir? En angʼo ma dadwoki ka Nyasaye obiro yala? Donge Jal mane ochweya e ich ema nochweyogi bende? Donge en onogo ema ne ochweyowa duto ei minewa? “Kapo ni asetuono jodhier gik magidwaro kata asemiyo wangʼ dhako ma chwore otho chandruok ojonyo, kata kapo ni asechamo kuona kenda, ma ok apoge ne nyithind kiye, to nyaka aa e tin-na asekonyo nyithind kiye mana kaka akonyo nyithinda awuon, kendo chakre tin-na asebedo ka atayo mon ma chwogi otho. Kapo ni ne aneno ngʼato angʼata ka koyo nego, kata ka jachan moro onge gi law, to donge ne ogwedha gi chunye nikech ne atwangʼone lewni maliet gi yie rombena. Kapo ni asesando nyithind kiye moko, nikech an gi teko kama ingʼadoe bura, to kara bada ochodi olwar piny oa e goka, kendo mad ochodi olwar piny koa kama ochomoree. Nikech ne aluoro kethruok ma Nyasaye nyalo kelona nikech luoro mane aluorogo duongʼne, omiyo ne ok anyal timo gik ma kamago. “Kapo ni aseketo genona e dhahabu kata asewachone dhahabu maler ni in e kar pondona, kata kapo ni chunya osetingʼore nikech mwandu mangʼeny ma an-go, kata ka asemor kuom mwandu mathoth ma lweta osechoko, kapo ni ne achomo wangʼa e ler mar wangʼ chiengʼ kata ka dwe ringo e tekone mos, mi dipo chunya nogombo lingʼ-lingʼ kendo ne atingʼonegi bada ka agombo lamogi, to mago bende gin richo manyaka bi kum, nikech ginyiso ni ok asebedo ja-ratiro ne Nyasaye man malo. “Kapo ni asebedo mamor ka jasika ni e chandruok kata ka asenyiere ka masira obirone, to chutho pod ok ayiene dhoga mondo otim richo ka aluongo kwongʼ e ngimane. Kapo ni jooda ne pok owacho nyaka nene ni, ‘Ere ngʼama pok Ayub omiyo chiemo moyiengʼ?’ to adier, onge ngʼama wendo mosenindo oko e laru, nikech dho oda nosiko koyaw ne jawuoth. Kapo ni asepando richona kaka dhano ohero timoga, kata ka akuot gi kethona e chunya, nikech ne aluoro ogandana ahinya kendo ne aluor ni anywolana ne nyalo sin koda mine alingʼ, kendo ne ok anyal wuok oko. “Yaye, mad dine ngʼato bedie manyalo winja, nikech koro e akwongʼora ni weche ma awachogi gin adier mondo Jehova Nyasaye Maratego obed janeno mara; to ka ok kamano, to ngʼat modonjona oket wechegego e ndiko. Adier, dine arwake e goka, dine asidhe ka osimbo. Dine anyise sigand ngimana kaka chalo; kendo dine adhi e nyime kaka ruoth. “Kapo ni asemayo ngʼato puothe mi apuro, kata kapo ni asechamo cham monyakie puothe ka ok achulo, to eka jopur mane opure to kech nego, to ber mondo kuthe odongi kar ngano kendo buya odongi e puothano kar shairi.” Weche Ayub orumo gi ka. Elihu odwoko osiepe Ayub Omiyo ji adekgi noweyo dwokore gi Ayub, nikech noparo ni en ngʼama kare. To Elihu wuod Barakel ja-Buz, mane wuok e anywola mar Ram ne iye owangʼ gi Ayub nikech nopwoyore kende owuon kaka ngʼat makare, ka ok oweyo Nyasaye ema mondo opwoye. Iye nowangʼ bende gi osiepe Ayub adek nikech negisiko mana ka gingʼado ne Ayub bura, to kata obedo nine oonge ketho. Elihu norito mondi eka oloso gi Ayub nikech ne en ngʼama tin e diergi. To kane oneno ka ji adekgo osewuoyo mi wechegi orumo, to mirima nomake. Eka Elihu wuod Barakel ja-Buz nowacho kama: “An atin kuom higni, kendo un joma dongona; mano emomiyo naluor, kendo ne ok an gichir mar nyisou gima angʼeyo. Naparo e chunya ni, ‘Higa ema mondo owuo; kendo dak amingʼa e piny ema mondo opuonj rieko!’ To ngʼeuru ni chuny manie i dhano, ma en much Jehova Nyasaye Maratego, ema miyo dhano winjo tiend weche. Jomadongo kende ok ema nigi rieko, kata ok ni joma hikgi ngʼeny ema nigi ongʼeyo gima kare. “Kuom mano, awacho kama: Winjauru; an bende koro adwaro nyisou gima angʼeyo. Uwinjo, ne arito mondi kane uwuoyo, ne achiko ita ne wecheu mukwano ni nigi rieko; kinde mane umanyo weche monego uwachi, ne achikonu ita adimba kinde mane uwuoyo, to onge ngʼato kuomu moseyudo Ayub gi ketho; kendo onge ngʼato kuomu mosedwoko weche Ayub. Kik uwach ni, ‘Ngʼatni riek motamo wangʼwa, Nyasaye ema mondo okwere, to ok dhano!’ To Ayub pod ok omino koda wach, omiyo ok abi dwoke kaka usebedo ka uduokeno. “Jogi dhogi omoko, gionge gima ginyalo dwoko; weche orumonegi. Gichungʼ achungʼa maonge gima giwachi, koro pod arit arita kata obedo ni gilingʼ kamano? An bende koro abiro wacho makora; kendo abiro nyisi gima angʼeyo. Nikech weche opongʼo chunya, kendo gichuna nyaka anyisigi; bende achalo gi chupa ma divai opongʼo iye kendo ka pien divai manyien madwaro barore. Nyaka awuo eka abed gi kwe; omiyo nyaka adwoki. Ok abi dewo wangʼ ngʼato bende ok abi wuondo ngʼato; nikech ka dine bed ni alony e wuondo ji to Jachwechna ditieka piyo nono. “To koro, Ayub winj wechena; chik iti maber ne gik ma awacho duto. Achiegni chako wuoyo; kendo weche duto manie chunya abiro wacho. Abiro wachoni weche mawuok e chunya kendo wechenago gin adiera. Roho mar Nyasaye ema nochweya, kendo Roho mar Jehova Nyasaye Maratego ema miya ngima. Omiyo koro dwoka ane kinyalo; kendo iikri maber mar choma tir. E nyim Nyasaye achal achala kodi nikech an bende nochweya mana gi lowo. Kik agoyi gi mbi mi iluora, kiparo ni aloyi e yo moro amora. “To weche duto misewacho asewinjo maber. Isewacho ni, ‘Aler kendo aonge richo; ngimana ler kendo aonge ketho moro amora. To eka Nyasaye to okawa ni an jaketho; kendo okwana kaka jasike. Otweyo tiendena gi nyororo; kendo obedo korango yorena duto.’ “To anyisi ni pachino obam, nikech Nyasaye duongʼ moloyo dhano. Angʼo momiyo iywagorine kiwacho ni ok odew weche ma dhano ywaknego? Nikech, kiwacho adier, to Nyasaye owuoyo gi ji pile e yore mopogore opogore, kata obedo ni dhano sa moro ok nyal winjo tiend wechene. Owuoyo gi ji e lek, kata e fweny gotieno seche ma dhano ni e nindo matut, ka giyweyo e otendnigi; onyalo wuoyo e tie itgi mi obwog-gi gi siem mayoreyore, otimo kamano mondo olok dhano owe timbene maricho kendo ogengʼ dhano kik sungre, mondo orese e lak tho, kendo kik tiek ngimane gi ligangla. “Okelone dhano tuo kendo opongʼo dende gi rem mondo rieyego. Ngʼat matuono dhoge bedo marach, ma kata chiemo mamit manade koro dungʼne mana marach. Dende dhiyo adhiya, mi chokene ma yande opondo koro nenore oko. Chunye sudo machiegni gi bur matut, kendo ngimane yware machiegni gi joma osetho. “Kamoro dipo ka achiel kuom malaike gana gi gana mag Nyasaye ma paro ni ngʼato tich monego oti nyalo konye, mi ngʼwon-ne kowacho ni, ‘Weyeuru kik utere e kar tho, nikech oseyudo yor resruok.’ Bangʼ mano ngʼatno nyalo chango mi pien dende chak dog ka pien dend nyathi matin mana kaka nochal kotin. Koro olamo Nyasaye mitimne ngʼwono, opongʼ gi mor koneno Nyasaye, kendo Nyasaye tingʼe malo kuom tim makare. Koro ngʼatno nyalo biro e nyim ji mi owachnegi ni, Ne atimo richo mi aloko ber obedo rach, to Nyasaye ne ok ochula gi gima owinjore gi kethona. Ne oreso ngimana mondo kik adhi e piny joma otho, omiyo koro abiro medo bedo mangima, mi ane ler. “Nyasaye nyalo timo gigi duto ne ngʼato angʼata nyadiriyo kata nyadidek, mondo omi olok chuny ngʼatno kik dhi e piny joma otho, eka ler mar ngima omed rieny kuome. “Chik iti maber, Ayub, kendo winj gik manyisi; lingʼ mos, nimar abiro medo wuoyo. Ka in gi gimoro amora minyalo wacho, to dwoka; wuo awuoya, nikech adwaro lero kori, to ka ok kamano, to chik iti iwinja; kendo lingʼ mos nimar abiro puonji rieko.” Eka Elihu nowacho kama: “Winjuru wechena, un joma riek; chiknauru itu, un joma osomo. Nikech it temo weche mana kaka lep bilo chiemo. Wayieruru kendwa gima nikare; wapuonjreuru kaachiel kuom gima ber. “Ayub wacho ni, ‘Aonge ketho, to Nyasaye otamore timona maber. Kata obedo ni an kare, to pod ikwana mana ni an ja-miriambo; kata obedo ni aonge ketho, to asere mare osechwoya, moweya gi adhola ma ok thiedhre!’ To en ngʼa machalo gi Ayub; mamodho ajara kaka pi? En e achiel gi joma timbegi richo; kendo oriwore gi joricho. Nikech osebedo kowacho ni, ‘Onge ohala ma dhano yudo, ka otemo matek mondo otim gima ber ne Nyasaye!’ “Omiyo lingʼuru uwinja, un joma nigi winjo. Nyasaye ok nyal timo gima rach kata dichiel, Jehova Nyasaye Maratego ok tim gima ok owinjore. Ochulo dhano kaluwore gi timbene okelone mana gima owinjore gi timbene. En gima kwero mondo Nyasaye otim gima ok owinjore; kendo mondo Jehova Nyasaye Maratego ongʼad bura ma ok nikare. En ngʼa mane okete jarit piny? En ngʼa mane oketo piny duto e bwo tekone? Ka dabed ni Nyasaye ogolo muche makelo ngima kuom dhano, to ji duto ditho dichiel kendo dhano didogi e lowo. “Ka un gi winjo adier to winjuru wachni; kendo chikuru itu ne gima awacho. Ngʼama ochayo adiera bende nyalo rito loch adier? Ere gimomiyo iketo bura kuom ngʼama ja-ratiro kendo Jal Maratego? Donge Nyasaye ema wacho ne ruodhi ni, ‘Un joma nono,’ kendo owacho ne jo-mwandu ni, ‘Timbeu richo,’ Nyasaye ok odewo kata mana wangʼ ruodhi kendo ok otim maber ne jo-mwandu to jochan to oweyo, nikech gin duto gin chwech lwete? Joma roteke tho apoya e dier otieno; inegogi mi gilal nono, kendo igologi e dier ji, to ok gi lwet dhano. “Wangʼe osiko karango timbe ji; oneno okangʼ kokangʼ ma gigoyo. Onge kama otimo mudho kata kama olil gi tipo ma joricho nyalo pondoe. Onge gima ochuno ni Nyasaye nyaka non dhano amingʼa eka okelgi e nyime mondo oyalgi. Oketho telo mar joma roteke ma ok oyalogi kendo oketo joma moko e telo kargi. Nikech ongʼeyo timbegi oloko loch mag-gi gotieno mi otiekgi chuth. Okumo joricho e lela nikech timbegi maricho kama ji duto nyalo nenogie, nikech negilokore giweyo luwe kendo ne ok gidewo yorene kata achiel. Negimiyo ywak joma odhier ochopo malo e nyime, mine owinjo ywak jochan. Kata ka nenore ni olingʼ, to en ngʼa ma dingʼadne bura? Koso kopando wangʼe, to en ngʼa ma dinene? To kata kamano en ema orito ogendini mondo kik gibed e bwo loch ngʼat mokia Nyasaye, kendo machiko ni ji obadho. “Ka dipo ngʼato nyalo wachone Nyasaye ni, ‘Aseketho to ok anachak atimne ngʼato marach. Puonja mondo ane gik mopondona; kapo asetimo gimoro marach, to ok abi achak atim kamano kendo!’ Ere kaka idwaro ni Nyasaye otimni maber, to in to idagi lokori? In ema nyaka ingʼad e pachi iwuon, ok an, omiyo koro nyisane gima ingʼeyo. “Joma nigi winjo nyiso pachgi joma riek mawinja wachona ni, ‘Ayub osewuoyo maonge rieko; osewacho weche ma ok oparo maber.’ Yaye, mad med ameda temo Ayub nyaka giko nikech aduokane chalo aduoka ngʼama timbene richo. Omedo dhi nyime gi timo richo koyanyo Nyasaye e nyim ogandane, kendo omedo wuoyo marach kuom Nyasaye.” Eka Elihu nowacho kama: “Bende iparo ni itimo gima ber kiwacho ni, ‘In kare e nyim Nyasaye?’ To e iyeno bende ipenjo ni, ‘Mano to konya gangʼo, koso ohala mane ma ayudo ka ok atimo richo?’ “Daher mondo adwoki in kaachiel gi osiepenigo. Ngʼiuru polo malo mondo unee boche polo kaka ni kuma bor. Ka umedo timo richo, to obadhe gangʼo? Kata ka richou ngʼeny to mano nyalo timone angʼo? Ka un joma kare to bedou makare miye angʼo, koso en angʼo muchiwone? Timbeu maricho hinyo mana dhano machal kodu, kendo timbeu makare bedo konyruok mana ne yawuot ji. “Ji ywak malit nikech tingʼ mapek moyie kuomgi; giywak mana ni mondo ogolgi e bwo loch joma thirogi. To onge ngʼato kuomgi mawachoe ni, ‘Nyasaye mane ochweya nikanye, Nyasaye mamiyo ji wende gotieno, mapuonjowa gik mathoth moloyo kaka opuonjo le manie piny kendo mamiyo wabedo mariek moloyo winy mafuyo e kor polo?’ Ok odwok ji ka giywakne nikech wich teko mar joricho. Adier, Nyasaye ok chik ite ne ywakgi maonge tiendgi Jehova Nyasaye Maratego ok dewgi. Iwacho ni Nyasaye ok winj wecheni ka iwacho ni ok inene, kata obedo ni isetero kwayoni e nyime, kendo pod irite mondo odwoki. Bende imedo wacho ni kata ji ok okum gi mirimbe mager kendo kata mana richo ma ji timo ok obadhe. Omiyo Ayub wuoyo ka ngʼama ofuwo; maonge rieko.” Elihu nomedo wuoyo kawacho niya: “Wena thuolo matin mondi to abiro nyisi ni nitie mathoth manyalo wacho kuom Nyasaye. Ngʼeyo ma an-go agolo kuma bor; kendo koro adwaro nyiso kaka Jachwechna timo gik makare. Bed kingʼeyo ni wechena ok gin miriambo; ngʼeni ngʼama ongʼeyo gik moko malongʼo chuth ema ni kodi. “Nyasaye nyalo duto, to kata kamano ok ochayo ji; onyalo duto kendo chenro mage ok lokre. Ok owe joricho kangima, to omiyo joma ithiro ratiro margi. Ok ogol wangʼe oko kuom joma kare; oketogi e loch kaachiel gi ruodhi kendo otingʼogi malo nyaka chiengʼ. Ka otwe ji gi nyiroro, kendo ka oridgi matek gi tonde mag masiche, to onyisogi gik magisetimo; kendo ni giseketho ka ok gidewo. Omiyo giwinje korieyogi kendo ochikogi ni gilokre giwe timbegi maricho. Ka giwinjo wachne mi gitiyone, to gibiro dak e mwandu ndalogi mabiro, kendo gibiro dak ka gin gi gimoro amora e higni mabiro. To ka gitamore winje, to ligangla biro tiekogi, kendo gibiro tho ka gionge rieko. “Joma okia Nyasaye chunygi opongʼ gi mirima ma kata ka okumgi to ok giywagre mondo oresgi. Omiyo githo ka kapod gitindo ka ngima marach otieko tekregi. To joma ni e chandruok oreso e chandruokgi; owuoyo kodgi e kinde ma gin gi chandruok. “Ogoli e masiche kendo oteri kama onge chandruok mondo omiyi kwe gi chiemo mogundho. Sani to koro eri iyudo kum maromre gi joricho; nimar kum kod adiera oketi diere. Bed motangʼ kik ngʼato wuondi gi mwandu, kendo kik iyie ngʼato omiyi asoya mathoth mi iwe Nyasaye. Koso iparo ni mwanduni mathoth kata nyagruok minyagori, gi tekri iwuon nyalo siri mi goli e chandruok? Kik igomb mondo piny oyusi, mondo otim timbe mahundu. Tangʼ mondo chandruok kik dwoki e richo. “Parie kaka teko Nyasaye duongʼ en e japuonj maberie moloyo? En ngʼa manyalo nyiso Nyasaye yore monego oluw, kata manyalo kwere ni, ‘Isetimo marach’? Kik wiyi wil mak ipako tijene ma gin tijene ma ji osepako gi wer. Ji duto modak e piny osenene adier gisenene gi kuma bor. Mano kaka Nyasaye duongʼ, adier oduongʼ mokalo ngʼeyo kendo kata hike ok wanyal kwano. “Ochoko ngʼich mar pi kogolo ewi pige, kendo olokogi koth mi gichak gichue gipongʼ aore; omiyo koth chue ne ji koa e boche polo. En ngʼa mongʼeyo kaka boche polo ringo, kata kaka polo mor? Neye kaka omiyo mil polo menyo kor polo duto, ka chuny nam to dongʼ kotimo mudho. Kamano e kaka orito ogendini kendo omiyogi chiemo mogundho. Omako mil polo gi lwete kendo otimogo gima odwaro. Mor polo miyo wangʼeyo ni koth maduongʼ chiegni chue, kendo koda ka jamni ongʼeyo ni koth ma kamano biro chue. “An bende mor ma kamano miyo chunya bwok kendo ridore. Lingʼuru kendo uwinj dwond Nyasaye kaka mor ka polo, kendo winjuru weche mawuok e dhoge. En emomiyo mil polo menyo kor polo duto, chakre tungʼ piny konchiel nyaka komachielo. Bangʼ mano iwinjo dwonde ka mor matek kendo omor gi dwol mar duongʼne. Ka dwonde ochako mor, to onge gima nyalo gengʼe. Dwond Nyasaye mor e yo miwuoro; otimo gik madongo moyombo parowa. Owacho ne pe ni, ‘Lwar piny,’ kendo ne nyidho matin ni, ‘Lokri koth maduongʼ.’ Otimo kamano mondo ji duto mane ochweyo, ongʼe kaka tichne chalo mi ji duto bed gi luoro nikech teko mare. Le ringo pondo; gisiko e buchegi. Ahiti biro koa kuma opandee, kendo koyo mangʼich bende yamo riembo mi ke. Much Nyasaye kelo pe kendo pige mopongʼo wi lowo poto mabed matek ka lwanda. Opongʼo boche polo gi ngʼich mar pi kendo okeyo mil polo mare ei bochego. Gilwore mana kaka Nyasaye dwaro, ka gidhi e wangʼ piny duto ka gitimo gima ochikogi. Ndalo moko Nyasaye kelo rumbi e piny mondo okumgo ji, to ndalo moko okelo koth mondo onyisgo herane. “Winjie wachni, Ayub; bed mos ipar gik miwuoro mag Nyasaye. Bende ingʼeyo kaka Nyasaye chiko boche polo kendo kaka omiyo polo mil? Bende ingʼeyo kaka boche oliero e kor polo, gik miwuoro mag Jal ma riekone tut mogik? To in ma kinde ma yamb milambo kudho mi two piny, to isiko mana ka luya chami ei lewni mirwakogi, bende inyalo konye yaro polo, mi obed matek ka mula mothedhi? “Nyiswa ane gima dwanyis Nyasaye machalo kamano ka kata mana pek ma wan-go ok wanyal ketone e yo mayot. Bende en gima owinjore mondo onyise ka adwaro wuoyo? Donge ngʼama ohedhore timo kamano dotieki? Koro onge ngʼama nyalo rango wangʼ chiengʼ tir, nikech polo olendo kendo orieny makech; yamo oseriembo boche duto moweyo kor polo nono. Nyasaye wuok koa yo nyandwat ka en gi duongʼ malich machalo gi lich mar dhahabu. Jehova Nyasaye Maratego oyombowa mabor kendo en gi teko maduongʼ ok otim marach ne ji, nikech en ja-adiera kendo opongʼ gi tim makare. Mano emomiyo ji miye luor, nikech ok opak joma pachgi wuondo ni riek.” Jehova Nyasaye odwoko Ayub Eka Jehova Nyasaye nodwoko Ayub gi ei yamo maduongʼ. Nowacho kama: “Ma to en ngʼa ma umo riekona gi weche mofuwo? Koro aa malo ka dichwo; mondo idwoka weche, madwaro penjigi. “Ne in kune chiengʼ mane achungo mise mag piny? Nyisa ane, bende ingʼeyo wachni! En ngʼa mane opimo borne gi lachne? Ero iwacho ni ingʼeyo! En ngʼa mane orieyo tol kane ipime? Mise mage noyie e angʼo? Koso en ngʼa mane oketo kidi momake motegno? Chiengʼ mane sulwe mokinyi wer kanyakla kendo mane malaike duto kok gimor? “En ngʼa mane ochoko nam kanyachiel moloro kuonde monyalo wuokgo kane obubni kowuok e bwo lowo? En ngʼa mane otimo kamano kane aume gi boche kaka nangane kendo kane aboye ei mudho mandiwa; kane aketone tongʼ mage kendo achungone dhorangeye ka keto sirni mage kuonde mowinjore? Kane awacho ni, ‘Ka ema onego ichopie ma ok ikalo; ka e kama apaka magi nyalo dhwolore mi gike’? “Bende nitiere chik misegolo mondo piny oyawre, kata nyiso kogwen mondo obedie? Bende isechiko piny mondo oyawre maler mamiyo joricho wuok kuonde ma gipondoe? Ka piny yawore to gik moko duto nenore maler; mana ka kido mogor e nanga. Joma timbegi richo itamoe ler, kendo lwetegi ma gitingʼo malo jony ma ok nyal timo gimoro. “Bende isewuotho michopo nyaka e sokni manie bwo nam kata wuotho ei kude kuonde mogajore? Bende osenyisi dhorangaye mag tho? Koso bende iseneno dhorangeye mag tipo mag tho? Bende ingʼeyo chuth ni piny duongʼ maromo nade? Nyisa ane ka ingʼeyo gigi duto? “Yo miluwo kidhi dala ler en mane? Mudho to odak kanye? Bende inyalo kawogi mi idwokgi kuondegi? Bende ingʼeyo yo midhigo miechgi? Nenore ni ingʼeyo, nikech ne gichakore kosenywoli! Isedak amingʼa miwuoro! “Bende isedonjo e dere mokanie pe madongo kata neno dere mag pe matindo, ma akano ne kinde mag chandruok, ne odiechienge mag lweny gi kedo? Bende ingʼeyo yo midhigo kuma mil polo riadore, kata yo ma yembe mag wuok chiengʼ wuokie kikeyo e piny? En ngʼa mane osiemo ni koth maduongʼ kod mor polo kama onego giluw, mondo okel ngʼich kama onge dhano modakie ma en piny motimo ongoro maonge dhano kata achiel, mondo oduog chuny piny motwo kendo omi lum mangʼich twi? Koth bende nigi wuon mare? Wuon thoo mamoko e lum en ngʼa? Min pe to en ngʼa? Min koyo maa e polo to en ngʼa, mamiyo nam doko matek ka kidi, kendo mamiyo nam doko matek ka lwanda? “Bende inyalo choko sulwe mag yugni mitue? Bende inyalo keyo yugni mochokore kanyachiel? Bende inyalo miyo sulwe maratego mondo owuogi e kindene mowinjore kata chiko sulwe mar olworo budho yo monego oluw? Bende ingʼeyo chike mag polo? Bende inyalo keto chike Nyasaye mondo orit piny? “Bende inyalo golo chik ne boche polo mondo okel koth maduongʼ? Bende ioro mor polo e yoregi ma giluwo? Bende digiduoki kagiwacho ni, ‘Eri wan ka’? En ngʼa mane oketo rieko e obwongo dhano kata mane oketo winjo e pache? En ngʼa mariek manyalo kwano boche polo? Koso en ngʼa manyalo lengʼogi mondo koth ochwe, milok buru bed matek malos gogni? “Bende dinyal dwaro chiemo ni sibuor madhako kendo ipidh sibuoche modenyo, e kinde ma gibuto e gondgi kata ka gibuto e bungu? En ngʼa mamiyo agak chiemo ka nyithinde ywagore ne Nyasaye, kendo bayo koni gi koni ka dwaro chiemo? “Bende ingʼeyo kinde ma diek manie got nywolie? Bende iseneno gi wangʼi ka ngao nywolo nyathine? Bende inyalo ngʼeyo dweche ma igi pongʼie? Bende ingʼeyo sa ma ginywolie? Gigoyo chonggi piny ka ginywol, kendo muoch makayogi rumo bangʼ mano. Nyithindgi dongo motegno kendo mopugno ka gin e thim; kendo giwuok to ok giduogi. “En ngʼa mane ogonyo kanyna e bungu? En ngʼa mane ogonyo tonde mane otweyego? Ne amiye thim motwo kaka dalane, kendo namiye kuonde motimo chumbi mondo odagie. Gidak mabor gi mier, omiyo ok giwinj koko ma ji goyo; kendo ok owinj koko mar jariembo. Okwayo ewi gode eka oyud lum mochamo kendo omanyo gimoro amora mangʼich. “Bende jowi ma e thim yie tiyoni? Bende inyalo kete mobed mos e kund jambi gotieno? Bende inyalo boye moluni opara tir? Bende onyalo puroni kuonde modongʼ bangʼi ma ok opurore maber? Bende diket genoni kuom tekone mangʼenygo? Bende inyalo weye ne tiji matek mondo otimni? Bende in-gi adiera ni onyalo tingʼoni cham misekayo mokelni dala mi okelgi kar dino? “Udo kwadho bwombene gi mor, to ok onyal huyo moloyo magungu kod nyamnaha. Onywolo tonge piny e lowo kendo oweyogi ewi kuoyo mondo giyud liet, kendo ok odew ni gimoro kata le mar bungu nyalo nyonogi mi gitore. Ojwangʼo nyithinde ma pod yom, ka gima ok gin mage owuon; to bende ok odew rem mane owinjo konywologi; nikech Nyasaye ne ok omiye rieko kata paro mar pogo gima ber. Kata kamano ka oyaro bwombene mondo oringi, to oyombo kata mana faras maringo matek moloyo ma jaithne riembo. “In ema imiyo faras teko ma en-go koso in ema ne irwakone pien man-gi yier maboyo e ngʼute? In ema imiyo ochikore ka bonyo, kobwogo ji gi giro mar sunga? Ogwetho piny gi mirima gi tekre duto, kendo ogiro gi tekre duto kochomo kar lweny. Ok oluor kendo onge gima goye kibaji, kendo kata mana ligangla ok obadhrene. Pien motingʼie asere tuomore e bathe kama oliere, kaachiel gi tongʼ mamil kod bidhi. Ogwetho koikore ne lweny; nikech ok onyal lingʼ mos ka turumbete oseywak. Ochur seche duto mowinjo ka turumbete ywak! Owinjo tik lweny gi kuma bor, kendo koko mar jochik lweny kod mano mar lweny owinjo chon. “Riekoni bende nyalo miyo ongo ringi mi oyar bwombene kochomo yo milambo? Bende inyalo chiko ongo mi fu kochomo polo, kata miyo oger ode ewi yien? Odak ewi lwendni maboyo kendo odak kuno nyaka otieno; kendo kind lwendni e kare mar pondo. Kanyo ema omanye chiembe kendo wengene nyalo nene gi kuma bor. Nyithinde matindo to remo e chiembgi, kendo kama gima otho nitie, ema iyudogie.” Jehova Nyasaye nowachone Ayub kama: “Bende nitiere ngʼat mapiem gi Jehova Nyasaye Maratego manyalo kwere? Mad koro ngʼat mamino wach gi Nyasaye oduokeane!” Eka Ayub nodwoko Jehova Nyasaye kama: “Yaye Jehova Nyasaye, ok aromo dwokora kodi omiyo mano ema omiyo alingʼ. Asewuoyo moromo, to ok ayudo dwoko omiyo koro ok abi wuoyo kendo.” Eka Jehova Nyasaye nodwoko Ayub gi ei yamo maduongʼ. Nowacho kama: “Chungʼ ane ka dichwo; mondo idwoka weche, ma adwaro penjigi. “Angʼo momiyo iketho adiera mara? Angʼo momiyo iketo rach kuoma mondo in inenri ka ngʼama ber? Bende in gi teko machalo gi mar Nyasaye koso dwondi bende nyalo mor kaka mare? Ka kamano, to kare bidhriane, kirwakori gi duongʼ, luor kod ber. Bangʼ mano rang jogo ma sungore, kendo iol mirimbi mager kuomgi mondo omi gibolre. Ee, rang joma sungore duto kendo, ikumgi kama gichungoeno mondo omi gibolre. Ikgi duto e lowo; mondo ji kik negi kendo. Kinyalo timo kamano to an owuon ema anakuong paki ni tekri iwuon ema omiyo iloyo. “Parane rawo, mane achweyo kaka ne achweyi kendo machamo lum kaka rwadh pur chamo. Parie teko mangʼeny ma en-go, kendo parie teko maduongʼ manie leche mag dende! Iwe yamo tero ka yiend sida; kendo leche manie bembene omoko kuome maber. Chokene otegno ka mula, kendo tiendene otegno ka chuma. Ikwane kaka chwech maberie moloyo mar Nyasaye e kind le duto, kendo en mana Jachwechne kende ema nyalo chome gi ligangla. Ochamo lumbe motwi ewi got, kuonde ma le mager ema kwayoe. Onindo piny ei saka kendo opondo e dier odundu motwi e thidhna. Saka oime gi tipone; kendo omburi motwi e tie aora olwore. Kata ka aora opongʼ moo oko, to ok bwoge; chunye ngʼich angʼicha kata ka aora Jordan opongʼ kendo mwomore marach. En ngʼa manyalo dino wangʼe mi make, kata madi duode mi tuch ume? “Bende inyalo mako nyangʼ miluongo ni Leviathan41:1 Dho jo-Hibrania luongo lee-no ni Leviathan, ma ji paro ni en le malich machalo gi nyangʼ. gi olowu kata tweyo lewe gi tol? Bende inyalo tucho ume mi isoe chuma kata tucho dhoge gi olowu? Bende nosik kokwayi ngʼwono? Bende onyalo wuoyo kodi kobolore? Bende dotim kodi winjruok mondo ikawe obed misumbani nyaka chiengʼ? Bende inyalo tugo kode ka winyo manie sigol, kata ka gimoro miywayo gi tol, ma digalgo nyiri matiyoni? Bende jo-ohala nyalo goyo nengone kata yangʼe mondo ji ongʼiew ringe? Bende inyalo tucho piene kod wiye gi bidhi michwoyogo rech? Kapo ni imake gi lweti to nisik kiparo amendno kendo ok nichak itim kamano kendo! Bedo gi adiera ni inyalo loye en miriambo; nikech nene kende ema nyalo miyi luoro migori piny. Onge ngʼato angʼata manyalo hedhore mar kwinye. Koro en ngʼa madihedhre chungʼ e nyima? En ngʼa manyalo bandha gope moro ni nyaka achule? Gik moko duto manie bwo polo gin maga. “Ok abi weyo mak awuoyo kuom tiende nyangʼni, tekre kendo kaka oduongʼ. En ngʼa manyalo dangʼo piende ma oko? Koso en ngʼa manyalo hoye mondo oket chuma e ume? En ngʼa manyalo hedhore yawo dhoge, dhoge ma lekene mabitho kendo lich oridoe? Dier ngʼe nyangʼno nigi okumba mar kalagakla ma ok pogre; ka moro ka moro kochom kuom nyawadgi ma kata mana muya ok nyal kadho e kindgi. Ochomgi motegno moro gi moro; kendo gimoko ma ok nyal pog-gi. Kogir to ler pilore e dhoge to wengene ler ka wangʼ chiengʼ ma thinyore kogwen. Mach makakni kaachiel gi pilni mach wuok e dhoge. Iro dhwolore kawuok e ume mana ka iro mawuok e bethe agulu michwako gi ma tiangʼ. Muche moko mach maliel, kendo legek mach makakni wuok e dhoge. Ngʼute opongʼ gi teko mathoth; kama okadhe, to luoro omako gik moko. Pien dende oriw motegno gimoko matek ma ok gingʼingʼni. Kore tek ka lwanda, kendo otek mana ka pongʼ rego. Nyasaye kochungʼ malo to joma roteke luoro mako; gitony kata kapok omulogi. Ligangla mochwoego ok time gimoro, bedni en tongʼ mabor, tongʼ machiek, kata bidhi. Chuma chalone lum kendo nyinyo chalone yien mosetop. Aserni ok mi oringi; orujre chalone mana ka chungʼ bel. Arungu oneno mana ka lum moro matin nono; kendo kobaye gi tongʼ to onge gima bwoge. Laini manie bund iye bitho ka balatago motore, kendo koluwo kama otimo chwodho to dongʼ ka kar dino ngano. Omiyo kut matut papni ka pi machwakore e dak kendo ouko nam ka mo machiek ei agulu. Oweyo yo moluwo karieny, kendo kama oluwono lokore buoyo. Onge gimoro amora e piny ngima minyalo pimo kode, kendo onge gima oluoro. Ochayo le duto mokawore ni lich; en ruodh le duto ma ji oluoro.” Ayub Eka Ayub nodwoko Jehova Nyasaye kama: “Angʼeyo ni inyalo gik moko duto; onge chenroni ma ngʼato nyalo gengʼo. Ne ipenjo ni, ‘En ngʼa ma umo riekona gi weche mofuwogi?’ Adier asewacho gik ma ok angʼeyo tiendgi, gik miwuoro modhiera ngʼeyo. “Ne iwachona ni, ‘Koro chik iti mondo iwinj gima awacho; abiro penji penjo, kendo ibiro dwoka.’ Asewinjo mana gi ita gima joma moko osewacho kuomi kende to sani koro aseneni gi wengena awuon. Kuom mano, achayora ahinya kendo ahulo richona ka bet piny kendo abukora gi buru.” Weche mogik Kane Jehova Nyasaye osewacho ne Ayub wechegi, nowachone Elifaz ja-Teman niya, “Iya owangʼ kodi kaachiel gi osiepegi ariyo, nikech ok usewacho weche ma adieri kuoma, kaka jatichna Ayub osewacho. Kuom mano, kaw rwedhi abiriyo gi imbe abiriyo mondo idhigo ir jatichna Ayub kendo utim misango miwangʼo pep ne un uwegi. Jatichna Ayub biro lamonu, kendo anawinj lemone ma ok anatimnu gima owinjore gi timbeu mofuwogi. Ok usewacho kuoma gik ma adier, kaka jatichna Ayub.” Kuom mano Elifaz ja-Teman, Bildad ja-Shua kod Zofar ja-Namath notimo gimane Jehova Nyasaye okonegi; kendo Jehova Nyasaye norwako lamb Ayub. Kane Ayub oselamo ne osiepene, Jehova Nyasaye nochako ogwedhe gi mwandu, kendo nomiye mwandu mathoth moloyo mane en-go mokwongo nyadiriyo. Owetene gi nyiminene kod ji duto mane ongʼeye mokwongo nobiro mochiemo kode e ode. Ne gihoye kendo gidwogo chunye kuom chandruok duto mane Jehova Nyasaye osekelone, kendo moro ka moro kuomgi nomiye pesa moko kod tere mar dhahabu. Jehova Nyasaye nogwedho higni machien mag ngima Ayub moloyo kaka nogwedhe mokwongo. Ne en gi rombe alufu apar gangʼwen, ngamia alufu auchiel, rweth pur alufu achiel, kod punde alufu achiel. Bende ne en gi yawuowi abiriyo gi nyiri adek. Nyare mokwongo nochako ni Jemima, mar ariyo Kezia, to mar adek ne en Keren-Hapuk. Onge nyiri mane ber e piny ngima ka nyi Ayub, kendo wuon-gi nopogonegi girkeni mage maromre gi owetegi. Bangʼ temni, Ayub nodak higni mia achiel gi piero angʼwen; noneno nyithinde gi nyikwaye nyaka tiengʼ mar angʼwen. Bangʼe Ayub notho, ka en jaduongʼ moti ma hike oniangʼ.